KNU brigade 5 hmunram sungah ralkap le BGF pawl KNLA thawn November 11 – 12 tiang nihnih sung an doawknak ah ralkap lam ihsin battallion hotu, company hotu telin mi 32 an thi ih mi 56 hriamhma an ngah tiah KNU Mutraw News ihsin thuthannak an nei.
November 11 ah ralkap brigade 8 hnuai khamahyah 406 ih ralkap pawl cu Phapon distric ဒွယ်လိုး peng မထော khua uksuh တောင်သုံးလုံး hmunram sungah an lut ih KNLA thawn nikhat sungah țum 5 an kap aw ih ralkap 14 an thi, mi 21 hriamhma an ngah tiah theih a si.
November 12 khalah မထော khua uksuh sung thotho ah a kap aw sal ih ralkap lam ihsin battallion hotu pakhat, company hotu pakhat telin ralkap 14 an thi ih mi 34 hriamhma an ngah tiah thuthannak ahcun an tarlang.
ဘောကျို့ထာ့ hmunram khalah November 12 zaanlam suimilam 1:00 – 1:35 tiang an kap aw ih ralkap lam ihsin ralkap 4 an thi, mi pakhat hriamhma a ngah thu, ဘူးသို peng ခေါပုတ် hmunram khalah ei-in phurtu ralkap pawl cu KNLA in an kap ih ralkap 6 an thi, mi 2 hriamhma an ngah tiah theih a si.
November thla thok ihsin ralkap le BGF pawl cu KNU brigade 5 Phapon distric sungih thazang an bet rero ruangah nitinten doawknak a um tiah KNU Mutraw News ihsin thuthannak an nei.
