မြဝတီ ih mi 25 thihnak thu ah KNDO in simfiangnak an nei
Karen ramkulh မြဝတီ District ဝေါလေ peng ကနဲလေး khua le မော်ခီး hlehka awknak ih um အူးဟူချောင်း Lilawn tuahnak ih hnaṭuantu mi 25 pawl cu Karen miphun ralkap KNDO pawlin an zaten an thah thluh a si, tiin Ralka cozah cun June 13 sun ah khan thuthang an rak suah. KNDO le anmah thawn kawpawmi hriamkai pawl cu May 31 ihsi thawk khan ဝေါလေpeng ah Kawl ralkap thawn nasa zetin an kahawk hnu ah အူးဟူးချောင်း lilawn tuahnak ih hnaṭuantu mipa 31, nunau 6 le nauhak 10 an zaten mipum 47 pawl cu an rak kai.
An kaihmi sung ihsin mipa 6, nunau 6 le nauhak 10 pawl cu an thlah thluh sal nan, mipa 25 pawl cu an zaten an thah thluh, tiin ralkap cozah thuthang cun an tarlang. Hi thuthawn pehpar in KNDO cun hi mipa rual mi 25 pawl hi Kawl ralkap an si ih lamzin tuah, Lilawn tuahnak ih hnaṭuantu vekin an ra um awter, an Uniform pawl khal telin ralkap an sinak evident tetti pawl khal a um, tiin an sim. Culawng siloin mithi pawl lakah hin mi ṭhenkhat cu Kawl ralkap pawlin hriamhreipi ih in rak kahnak ruangih thi an si, miṭhen khat cu an tlan ruangah KNDO lam in kan kah thatmi a si tiin thusuah an tuah.
Kawl ralkap cozah ih thlah thupmi thlingthlatu pawl cu an uniform le an sinak an rank tacik pawl thawn မြဝတီ District ah an kaih thu KNDO cun June 13 ah khan thusuah an rak tuah. An kaihmi pawlih uniform le an tacik pawl khal tetti hrangah Video record thawn an tarlang. Thlingthlatu pawl KNDO in an kaihmi hi anmah KNDO humhual ramsung a simi မြဝတီခရိုင်ကနဲလေး khaw kiang ah a si ih Lilawn tuah hnaṭuantu vekih um awter an si.
KNDO pawlih thahmi thlingthlatu ralkap 25 pawl hi Kawl ralkap acozah thuthang ca cun anmah Ralkap an si thu tarlang duhloin tualsungmi an si, KNDO pawlin lilawn tuah hnaṭuantu mi 25 an that tizawng in thuthang an her danglammi a si. Asinan KNDO pawl hin tualsung mipi, Lilawn tuah hnaṭuantupawl an thahmi a si lo zian, Kawl ralkap thlingthlatu an si zia, an uniform thawn siseh an tacik thawn siseh an tarlangmi a si. – Chin Net youtube ih tisuahmi Ca ih siar duhtu hrang kan post mi a si.
– Chin Net