Sum leh pai ah buaina a neilo bawk a, a duh ang a piang chu a nei nghal thei zel mai. Reality Star, Kim Kardashian chuan kum 1987 a London khawpui charity gala-a Princess Diana-in thi a awrhchhuah, Attallah Cross pendant chu a lei tih hriat a ni.
Kum 42 mi reality star aiawhtu hian Sotheby’s auction-ah amethyst leh diamond jewelry lian tak hi $197,453-in Kim K hian a lei niin an puang.
Tarlan danin, gem-encrusted crucifix hi Sotheby-in kum tin Royal & Noble auction an neih ṭhin minute nga hnuhnung berah hralh a ni a, Kardashian aiawh chuan he thi neih tum a chhang ve a elpui dang pathum a hneh a, auction neih hmaa hralhchhuah tura an hisap aiin a let hnih zet a tam in hralhchhuah a ni.
Kum 1920s daih a mi pendant hi luxury jewellery designer Garrard-a design a ni a, famta Princess Diana khan vawi eng emaw zat a awrhchhuak a, a lar ber chu October 1987 a London charity gala a tel tum a a awrh kha a ni.
Sotheby Head of Jewelry Kristian Spofforth chuan thuchhuah siamin “He thil hlu tak hian khawvel puma hming lar dang kutah nun thar a hmu thei hi kan lawm hle a ni” a ti hial bawk.
Kim Kardashian hian hrang hlui leh famta milar te thil a ngaihlu hle a, 2022 Met Gala neih ah pawh khan Marilyn Monroe in 1962 a President John F. Kennedy piancham a a hak “Happy Birthday, Mr. President” dress chu a rawn inbelchhuak a, fak leh selna tam tak a dawn phah a ni.
