Phakanh ah KIA miralṭha rualpawl in Kawl ralkap an va siim ih ralkap 4 hrawng an kap that
Tuisun, June 15, zinglam nazi 8 hrawngah Kachin ramkulh Phakanh peng နမ်ဂျမ် khua ah Kawl ralkap le KIA an kapaw ciamco tiah khawsungmi hnen ihsin theih a si. KIA lam hin Kawl ralkap pawl an va kahmi a si ih Kawl ralkap lam khalin hriamhreipi hmangin an rak kap nasa ve, tiin khawsung mi cun an sim.
Kawl Ralkap pawl hin hriamhreipi vei 10 lenglo an kap, Kawl ralkap lam hi mithi le hriamhma tuar an tam tiin kan thei, asinan ziangzat cekci an si ti cu kan theifiang lo, KIA pawlin an va siim mi a si ruangah an kap that tam zet ko ding, an kahawk sung hi minutes 15 sung hrawng lawng an rei, tiin khawsung mi pakhat hmin tarlang ngamlomi cun a sim.
Kachin ramkulh Phakanh peng ah hin Kawl ralkap pawl an duty thlengawknak an nei ih, Sakhan ih ralkap umpawl hmun dangah an ṭhawn ih mithar ra thlengtu pawl KIA lin an va kahmi a si. Hmin tarlang ngamlo khawsung midang pakhat cun “KIA pawlin an rak bawhthup ciami a si ih ralkap lam hi mithi an tam ko ding, kan theihdan vek asile, ralkap pawl hi amalbik pa 4 cu an thi, hriamhma tuar khal ziang maw zat an um, hramlak ih kapaw an si ruangah a cekci kan thei lo, Hitawk Sakhan ih ra thlengthar Kawl ralkap pawl hi mipum 60 hrawng an si, tiin a sim.
Tuizing, Phakanh pengih Kawl ralkap pawl va siim tu KIA pawl hi Brigade 9 ih miralṭha rualpawl an si, Kawsung mi cu hriamhma tuar le mithi an umlo tiah theih a si. Tufangte hi Kachin ramsung ih KIA le Kawl ralkap kahawknak thuthang theih ding a mal phah vivo thlang. Khat lam khat lam in ṭanṭhat an sir rero maw, asilole, daih lam an tum vivo lehlam a si hmang ding.
KIA lam cun March 25 sun ih an rak laksakmi Alaw Bum sakhan cu Kawl ralkap pawl kutsung thlengsal lo dingin Arpi fano hum bangin an hum ṭekṭek ve. Kawl ralkap lam hin tui’hlan ih ngahsal thei beisei ih nasa zetin an rak do vek cun an do nawnlo. Hihi lamzin dang an hawl tla a si thei, an ralkap thazang a cak nawnlo tla a si thei, tiin KIO ralbawipi Major Naw Bu cun a rak sim.
– Chin Net