ကသာ ah Kawl ralkap suamhmang le KIA nasa zetin an kapaw ciamco, Kawl ralkap lam mithi le hriamhma tuar an tam.
Mizansun, June 24, ah khan Sagain ramṭhen ကသာ peng ah KIA miralṭha rualpawl le Kawl ralkap suamhmang pawl nasa zetin an kapaw ciamco tiah theih a si. Hmin tarlang duhlo khawsungmi pakhat cun “Kawl ralkap pawl hin KIA ralthiam pawlih Bomb kammi an pal ngah, cutin zinglam ihsin zanlam tiang, sunvute rori an kapaw. Zinglam nazi 10 hrawngah khan ရွှေကျောင်းကုန်း khaw kiangih KIA pawlin Bomb an kammi cu Kawl ralkap pawlin an pal ngah, Bomb a puah le veten an lungphang in lu-sam mang lawn, tawngpa kah in meithal an kap ciamco.
Cun sunhnu nazi 2 luan deuh hrawng khalah nazi hrek sung hrawng nasa zetin an kapaw sal. Cun zan nazi 6 hrawngah an kapaw sal lala, Kawl ralkap lam hi mithi le hriamhma tuar an tam nasa, mithi le mina tuamhlawmtu ပရဟိတ pawlin miruak le hriamtuar pawl an hawl rero, tiin a sim.
Kawl ralkap pawl hi mithi le hriamhma tuar an tam ih ral an sun le veten ကသာ khawpi lam pan in lu-sam mang lawn an tlan ciamco. ကသာ khawpi ah hin CDM tuahlotu Sibawi ṭhenkhat an um, sunhnu deuh ihsi vansang lam in an buai rero zo, zan nazi 6 hrawngih an kahawknak khal mithi an tam, mi ruak an rak phurhlut mi a tam zet, tiin khawsung midang pakhat in cun The 7Media hnen ah a sim.
Mizansun, June 24 ni khat sung lawngah Sagain ramṭhen hmun tampi ah kahawknak a um, Mingin pengah PDF pawlin Kawl ralkap 19 rori an kap that, ကသာ peng ah KIA pawlin tam zet an kap that ve. Mai’ miphun le ram zalennak hrangih raldotu midikpawl lam ah Pathian ṭang vivo hram seh. – Chin Net youtube ih tisuahmi a si nan Ca ih siar duhtu hrang kan post mi a si.
– Chin Net