ကောလင်း khawpi ih Kawl ralkap le KIA/PDF ṭangkawp pawl kahawknak ah Kawl ralkap bawi pahnih telin ralkap 30 an thi.
Mizansun, July 2, zinglam ah khan Sagain ramṭhen ကောလင်း peng သစ်ဆိမ့်ကုန်း ah KIA Brigade 8 pawl le tualsung PDF KLPDF ṭangkawp le Kawl ralkap pawl cu zinglam nazi 10 hrawng ihsi thawkin zanlam nazi 4 tiang, ṭum 3 rori nasa zetin an kapaw ciamco tiah theih a si. Kawl ralkap pawl hi Sagain ramṭhen ihsin Kachin ramkulh ah ralthuam hriamhrei le mipum tamzet mawṭawpi in ra feh rerotupawl cu KIA le PDF ṭangkawp in an rak kah ciamcomi a si.
An kahawknak ah hin Kawl ralkap lam ihsin ကောလင်း peng uktu bawipi ခလရ (၁၁၁) ihsin ralbawi pakhat, ခလရ (၁၂၀) ihsin ralbawi pakhat le ralkap dang mi 30 hrawng KIA le PDF ṭangkawp in an kap that. Hriamhma tuar khal an tam nasa, kah thatmipawl hnakin hriamhma tuar an tam sawn tiah theih a si. Cui’ tlun ah Kawl ralkap mawṭawpi pa 5 pawl khal ကောလင်း khawpi lan deuh ah KIA le PDF pawlin an rak kah sak ih mawṭawpi pathum cu lak tlak um nawnlo in a kang alh thluh tiin an sim.
Kawl ralkap pawl ṭheuṭheu hi cu, hivekin ral an sung can ah mawhsualnak neilo tualsung mipi parah an cangvai ṭheu. Mizansun an kahawknak khalah ral an sung, mithi le hriamhma tuar an tam tuk ruangah an thin hngirṭeu in ကောလင်း khawpi sungah hriamhreipi an kap lut ciamco. Hivekin Kawl ralkap pawlin ကောလင်း khawpi sungih hriamhreipi an kahlut hrim ruangah tualsungmi nunau pakhat in hriamhma a ngah ih minung umnak inn ṭhenkhat khal an siat nasa, tin theih a si.
An kahawknak ah Kawl ralkap lam mithi 30 lai an um, ralkap tamzet in hriamhma an tuar tlun ah an mawṭawpi pathum rori an kap alhsak thluh. KIA le PDF lam ihsi cun mithi le hriamhma tuar pakhat hman an um lo thu khal theih a si. ကောလင်း peng ရွာရှည် khua ah July 1 zan ah khan Kawl ralkap pawl hnen ih mipi le tualsung hriamkai pawl zuar thlai ṭheutu “dalaan” hminthang zet ဦးကြည်ထူး timi cu zo ti theihlo hriamkai pawlin an rak that. Cumi thawn pehpar vivo in tuvekin Kawl ralkap le KIA/PDF ṭangkawp pawl kahawknak suakmi a si hmang.
Mizansun thotho ah khan Sagain ramṭhen ကသာ peng မိုးတားလေး khaw kiang khalah KIA pawlih bomb kami Kawl ralkap pawlin an pal ngah ih Kawl ralkap lam mithi le hriamhma tuar an um tiah theih a si.
Tualsungmi pakhat cun “မိုးတားလေး khaw lan phungki tlawng kiangih KIA pawlin bomb an kammi cu tuizing ah Kawl ralkap pawlin an pal ngah. Kawl ralkap pawl hi mipum an tam zet ih bomb puak khal a nasa zet ruangah mithi le hriamhma tuar an tam, tiin a sim.
Tufang hi Kachin ramkulh ah Kawl ralkap le KIA kahawknak hi hmun tin ah a um deuh ringring. Kawl ralkap in thuneihnak an lak hnu KIA le Kawl ralkap kahawknak hi July 11 ni ah khin Thla 4 a kim thlang ding. Thla 4 sung cawlloin an kapaw tinak a si cu. Kachin ramsung lawngah si loin Kachin ramkulh le Sagain ramṭhen ramri khalah KIA le Kawl ralkap hi nasa zetin kahawknak a um ringring. Sagain ramṭhen hi cu tualsung PDF le KIA an ṭangkawp ṭheu. – Chin Net youtube ih tisuahmi Ca in siat duhtu hrang kan post mi a si.
– Chin Net