KIA in Kawl ralkap mawṭawpi pahnih kap alh sak, mithi khal tampi an um

KIA in Kawl ralkap pawl mawṭawpi thawn an feh lai an rak kap i, mithi le hriamhma tuar an tam.

Tuizing, May 29, zinglam nazi 8 hrawngah khan Kachin ramkulh ပူတာအို peng Hpak Ma khaw kiangah Kawl ralkap pawl mawṭawpi thawn KIA do dingih an feh rero lai cu KIA Brigade 1 ih miralṭha rualpawl in lamzin sir ihsin an rak bawhthup cia ih an ra feh rero lai cu hmun le hmun ah an rak kah ciamco, tiin hmin tarlang duhlo khawsung mi pakhat cun a sim.

“Kawl ralkap le KIA an kapaw a si bik ko. Meithal puak awn khal kan thei ban. An kahawknak hmun hi khua ihsin a hla tuk lo, Kawl ralkap mawṭawpi pahnih KIA pawlin an kah alh sak thluh. Kawl ralkap lam hi mithi le hriamhma tuar an tam zet, tiin a sim.

Kawl ralkap pawl hi mipum 30 an si ih mawṭawpi pahnih thawn ပူအာအို khawpi ihsin an feh, peng 15 hrawng an thleng, Hpak Ma  khaw kiang, မြစ်ကြီး le ပူတာအို hlehka awknak lamzinpi parah KIA pawlin an rak kah ciamco mi a si. Kawl ralkap lam ihsi cun mithi le hriamhma tuar an tam ti a si ih a cekci theihfiang a si lo, KIA lam khal hriamtuar le nunnak liam an um le umlo thufiang theih a si hrih lo.

Mizansun, May 28, ah khan ပူတာအို khawpi ih ṭanhmun khuartu Kawl ralkap ခလရ (၄၆) pawl cu KIA Brigade 1, Battalion 7 ih miralṭha rual pawl in hlaral kahnak hriamhreipi in vei 2 an hi kap. Tuizing KIA pawlih an rak kah mi Kawl ralkap pawl hi, Mizansun ih KIA pawlin ပူတာအို khawpi ih ṭanhmun khuartu Kawl ralkap pawl an kah ruangah anmah pawl va bawm dingin hmun dang ihsin an rak kuatmi an si ko ding, tiin an zum.

 

Leave a Reply

Your email address will not be published.