Sagaing ramțhen Khinoo peng Ngiawngpingyi palik zung cu November 17 sunah Khinoo Local Guerrilla Force le PDF pawlin an laksak ih an urkang thu Khinoo peng News & Information department hnenin theih a si.
“Hi palik zung cu October 15 ah an rak suahsan zomi a siih zohman an um nawn lo, a kiangkap khua Tegonegyi ih hmunkhuartu ralkap pawl khal an kirsal thluh ih ralkap an um nawn lo, palik zung cu tuini ah an urkang” tiah Khinoo peng News & Information department ih țuanvo neitu pakhat in simnak a nei.
Ngiawngpingyi palik zung urkang laifang ah Khinoo khawpi ihsin motor 4 thawn ra fehtu ralkap pawl cu Mindawng khua kiangah PDF in bomb thawn an rak do thu, bomb puaknak kiangih Caw khaltu Mindawng khuami 2 cu ralkap in an kaih thu tualsungmi pawlin an sim.
