Sagaing ramțhen Khin Oo khawpi ih ralkap 2 cu August 21 zaanlam ah an hriamhrei famkim thawn an tlansuak tiah palik zung kiangih um mi pakhat in simnak a nei.
“Palik an si lo, ralkap 2 an tlansuak, an kaihmi hriamhrei famkim thawn an tlansuak tiah kan thei, ralkap pawlin myoma palik zung an um hnawh, cutawk ihsin tlansuak an si, an tlansuak caan hi felfaiten theihfiang a silo nain zaan suimilam 7:00 hrawng meisa thim caan ah ralkap le palik pawl cu motor thawn khawlak ah an suakvak kan hmu” tiah mi pakhat in a sim.
Khin Oo khawpi ah ralkap sakhan an hranten a um lo na’n myoma palik zung ah ralkap 20 hrawng an um ringring ih atu hi ralkap tlansuak hmaisa biknak a si thu theih a si.
August 20 khalah Sagaing ramțhen Yinmapin peng palik zung ihsin palik senthum pakhat cu hriamhrei famkim thawn CDM a rak lut zo.
