Yangon ramțhen Khayan khawpi ah ralkap bur motor thawi fehmi cu dothlennak tuahtu mino 2 in bomb thawn an do ih ralkap 5 an thih thu, dothlennak tuahtu mino 2 an thi ih mi pakhat hriamhma thawn ralkap in an kaih thu tualsungmi pawlin an sim.
September 17 zaanlam nazi 5:50 ah khawpi ငရုတ်သီးလှော် lilawn kiangih ralkap bur motor thawi fehmi cu bomb kam in an do ih ralkap pawl cu meithal an kah ciamco thu, khatlam khatlam kahawknak le bomb puakternak a um thu theih a si.
Tualsung Media Khayan Channel cun bomb puakter ih doawknak ah ralkap 5 an thi tiah a tarlang. “Atu kan suh theitawk ahcun ralkap 1 a thi, 2 hriamhma an ngah, hriamhma ngahtu ralkap 2 hi an bese zet tiah an rel, bomb ih dotu mino 2 cu an kap that, mi pakhat a nung in an kai, hriamhma a ngah ve, midang an um lai pei maw tiah lamzin an phit thluh ih an hawl rero” tiah palik thawi naivai Khayan khawpi ih um mi pakhat in a sim.
Hriamhma thawi an kaihngahmi mino pakhat cu tuamhlawm loin thuhla zingzoi dingah ralkap pawl cun an hruai tiah theih a si.
Cuihleiah Khayan khawpi ahhin September 17 zaan suimilam 6:30 le suimilam 7:00 hrawngah ralkap hmunkhuarnak lehpannak hall le palik zung hmai ih bomb a puak hnu kahawknak a thlen laifang ah mino pakhat khal kaih a tong. Hi an kaihmi ihsin September 18 ah thilthleng pehtlaih minung an hawl ding tiah theih a si.
Khayan khawpi luhsuahnak pawl cu ralkap pawlin an phit ih mi sukso an cek. Khawsung meisa khal an mit thluh tiah theih a si.
Tualsung media Khayan Channel cun kaihtong mino pakhat a thi tiah a tarlang ih tuițum buainak ih thihnak tongtu mino 3 an kim tiah a tarlang.
Ref : KTM, Mizzima, KC
