Guinness World Records in mihring dam lai zinga upa ber a alo puan Japanese pitar Kane Tanaka chu kum 119 a upa in a boral tih tarlan ani.
Mrs Tanaka hi January 2, 1903 ah piang in, hemi kum hian Wright te unau in an thlawhna hmuhchhuah hlawhtling taka boruaka an thunun theih leh an thlawhchhuah hmasak berna a nih bakah hmeichhe zingah Marie Curie in Nobel Prize chawimawina a dawn hmasak ber kum a ni bawk.
Guinness World Records chuan January 30, 2019 khan mihring damlai zinga upa ber ah a puang a. Hetih lai hian kum 116 leh ni 28 a upa chiah ani. Hemi tuma zawhna an zawhah a nunna hun hlimawm lai ber sawi tura tih chuan tuna a hun hman mek a nih thu in a chhang ani.
Thawhlehni liam ta April 19 khan Fukuoka city, western Japan a damdawiin ah a boral thu hi Japan’s state broadcaster chuan puangin a thihchhan chiang tak erawh tarlan a nilo thung.
1922 ah pasal atan Hideo Tanaka a nei a, an pahnih hian fa 4 neiin fa dang 5 an la (adopt) bawk. 2021 khan Ms Tanaka hi Tokyo Olympics ah inlan tura beisei a nih laiin hripui leng mek Pandemic vangin a tel thei lo.
January 2 ah kum 119 a tlinna champha hi lawmna buatsaih in a chhungte chuan kum 120 a dam thlen theih an beiseipui thu an sawi a, mahse a taksa lam a chak loh em vangin beisei angin kum 120 a chuang chhuak thei ta lo.
World Bank data in a tarlan danin Japan ram hi khawvel huap a kum upa tam berna a ni a, mihring cheng zinga 28 percent khi kum 65 chin chunglam an ni deuh fur. Ms Tanaka aia kum upa zawk hi a awm nia sawi China mi chu nikum khan kum 135 in a thi tih tarlan ani a, Komuxerik, Shule County, north-western Xinjiang Uygur Autonomous Region a cheng Alimihan Seyiti tia koh chu June 25, 1886 ah piang nia sawi awm bawkin mahse khawvel erawh in a hriatpui leh pawmpui a nilo thung.
Guinness in khawvel a kum upa ber a chhinchhiah theih tam ber chu French nu Jeanne Louise Calment niin 1997 khan kum 122 leh ni 164 a upa in a thi.
