Kochi, Kerala a hmeichhe pakhat chuan an chuanna Bus tlan lai mek chhunga passenger thi lek lek a awm chu a nunna a chhanhim sak tih hriat a ni.
He hmeichhia hi kum 34 a upa Sheeba Anish a ni a, Nurse hnathawk lai mek niin dar 9.10 pm vel ah a duty zo in lam a haw tura Bus a chuanna ah chuan vanduaina hi a thleng ani.
Bus chhung an luh hnu minute 10 a liam tih ah chuan a chuanpui passenger mipa pakhat kum 24 upa Vishnu chu nikhawhrelo in a tlu thut mai a, Sheeba Anish hian thi chhawng a awm mek a hmuh chuan a tih tur a hai lo.
Bus chhunga chuang an nih vang leh kawng ah lirthei vei vak dang an tam vangin rang takin damdawiin pan pui theih a nilo a, Vishnu hi a ka atang te in thil phuan a chhuah bakah a mar phu chuan hniam lam a pan zel hi. Sheeba hian a theih ang ang a sawng bawl a, CPR a pek hnu ah chuan damlo hi a rawn harh leh ta ani.
“Thil thleng kha a rawn rang teh thut lutuk a, khatia nikhawhrelo a a tluk thut vang khan Bus a chuang dang te pawh an chi ai hman hle. A ka atangin phuan a chhuak reng a, a mar lah a hniam zel si. Driver hnen ah rang taka damdawiin hnai berah ding turin ka hrilh a. Mahse kawng ah lirthei veivak a nasat em vangin hmanhmawh theih a nilo.
“A nunna chu chan mai thei dinhmun ah a awm mek a. Ka theih ang tawk a buaipuiin CPR te ka han pe a. Vawikhatna ah chuan engmah awmzia a awm thei lo. Mahse a vawi hnih nan CPR ka pek leh chuan a rawn harhchhuak leh thei ta a ni. Tun ai hian lo tlai hret ila chuan a nunna hi chhan a harsa tawh in a rinawm” tiin Sheeba chuan a sawi.
Sheeba hi Kochi a Apollo Adlux Hospital a hnathawk lai a ni. Bus chhung a mi pakhat nunna a chhan sak ah hian a thawhna Apollo Hospital te pawhin an fak in an chhuan zia an tarlang bawk ani.
Medical lam ten CPR pawimawh zia hi an sawi a, khawi hmun ah pawh hetianga vanduaina tawk an awm chuan chi-ai buai mai lova rang taka CPR pek vat hian damlo thi mai tur nunna a chhanhim phah thei tih an sawi bawk.
