Sagaing ramțhen Kawlin peng nisuahnak lam Phale khua kiangah ralkap pawl le Kawlin PDF cu October 28 zinglam ah an kap aw sal ih ralkap 25 hrawng an thi ih Kawlin PDF sungtel mi 3 an thih thu Kawlin Revolution – KR Team cun social media ah an tarlang.
Kawlin PDF sungtel pakhat in “tuini doawknak a um, kannih pawlkom thawn kan si lo, midang pawlkom thawn an si, ralkap lam a thi an tam, tualsung hriamkai khal mi 3 an thi tiah kan thei, phone line a țha lo ih doawknak dinhmun fiangten suh awk a harsa” tiah simnak a nei.
October 28 ih doawknak thuhla thawn pehparin KR – Team Kawlin cun “Kawlin khawpi nisuahnak lam Phale khua kiangah မုန့်ဟင်းခါး suangsal dingih a zuam rerotu miraltha pawl cu vei 25 hrawng a suansal hnuah miraltha 3 cu an țuanvo an țheh ih an cawl hahdam, miraltha pawlih cawlh hahdamnak cu a sunglawi ih kan upat, vei 25-nak hrangah kan lung a awi thei nawn lo” tiah social media ahcun an tarlang cih.
October 27 khalah Kawlin PDF le ralkap pawl cu Kawlin peng nisuahnak lam Kyautpinthar khua le Kachingone khua karlak ah doawknak a um ih ralkap khalahyah – 10 ih Major Ye Htut Oo (ကြည်း-၄၃၉၈၀) telin ralkap 40 hrawng an thi ih Kawlin PDF ihsin mi pakhat hriamhma a ngah tiah theih a si.
Major Ye Htut Oo ih ruak cu thaten an phum lo ruangah tualsungmi pawl le tualsung hriamkai pawlin an phorh sal ih thaten an vui sal thu Kawlin KR cun simnak an nei. Major Ye Htut Oo cu brigade 88 hnuaiih um Mague ramțhen Sakuk hrambun khalahyah – 10 ih țuanvo neitu a si thu theih a si.
