Tufang Chin ramkulh Mindat pengah doawknak a dai deuh thlang i, Kawl ralkap suamhmang pawl le Mindat khaw Nu/Pa pawl cu tuisun, June 18 ah thurelkhawmnak an nei tiah theih a si. Mindat pyituh ukchukzi a phuah cun hitin an tarlang.
CDF-Mindat, Mindat khaw Nu/Pa pawl le Kawl ralkap suamhmang pawl cu tuisun, June 18 ah tawnkhawm lairelnak nei ding kan si. Mindat Khaw Nu/Pa pawl hin CDF-Mindat le Kawl ralkap suamhmang pawl karlak palai ṭuan in tawnkhawm lairelnak an neihmi a si. CDF-Mindat in Kawl ralkap pawl direct ih tawng in an relkhawmmi siloin Khaw Nu/Pa pawlin CDF-Mindat ai an awhsak.
Sim zo bangin tufang CDF-Mindat le Kawl ralkap karlak kahawknak a um nawnlo nan, Kawl ralkap pawl hin Mindat mipi parah diklo zet in an cangvai rero lai. Mindat peng မဲင်း khua ihsin ေကျာက်ထု kiang lam ih ralrelh pawl hrang Sii le ei-in thilri pawl lei ih fehtu pawl cu an ra tlun lam ah Kawl ralkap pawlin June 16 sun ah khan an rak kai ih tutiang an thlah sal hrih lo, tiah theih a si.
An kaihmi pawl cu မောင်လောဂေ – ၂၉ နှစ်, မောင်ဂေအွမ် – ၂၆ le မောင်မှန်ထွန်း – ၂၉ tipawl an si. Tuvekin CDF-Mindat le Kawl ralkap karlak ah rualremnak tuah ding lam thuthang a um cu mipi zawn ruah tikah lungawi umza zet a si ko. Tufang cu Furpi caan, ruah ti tam laifang a si fawn, Kawl ralkap pawlin hramlak ih ralrelh pawl bawmtu an rak khamsak thluh fawn tikah Mipi pawl zangfak an um tuk rori. Hivekin a sur a sa lakih an tlan suksonak ah Naute thla 7 mi khal tuisun ah a nunnak a liam.
Kawl ralkap pawl do cimih ding le an cemral ding hi kan duh zetmi cu a si ko nan, mipi in an tuar tuk ṭheu ruangah mipi zawnruah a rak ṭul ṭheu fawn. Sim rero ṭheu zo bangin Ramṭhen dang le Ramkulh dangin an rak do velo tikah tufang a dotu pawlin kan tuar tuk lawmam. Mindat Khaw Nu/Pa le Kawl ralkap biakawknak khal ziangkim tluangten an tifel theinak dingah, Pathian in a ṭahbik in lairel hram seh. – Chin Net youtube ih kan tisuahmi Ca ih siar duhtu hrang kan post mi a si.
– Chin Net