Tuisun, simlam deuh ah khan Mindat khawpi sungih ṭanhmun khuartu Kawl ralkap suamhmang Battalion 274 pawl cu Helicopter pa 6 rori in ralkah an ra bawm i, ralthuam hriamhrei pawl an rak seek nasa tiin theih a si. Kawl ralkap suamhmang pawl hi Mindat khawpi sungih phungki tlawng le Ca zirnak tlawng tipawl ah ṭanhmun khuar in khawsung an um cilh.
Hriamhrei ṭhiṭha neilo ti an theihfiang ruangah Kawl ralkap suamhmang pawl hi duhtawk in Mindat khawpi tlun ah Helicopter thawn an zam huahhonak a si bik ko ding. KIA le KNU lam ahcun siseh la an feh ngam lamlam lo ding si khawh. Thinlung thuptei’ rak suangtuahmi cu CNA hin hriamhreipi an nei ve ding si khawh, Kawl ralkap pawl ralring lo zetih Helicopter an ra zam rero laifang ah CNA hin an hriamhreipi thawn rak kah thlaksak dumdo sehla cu an hung vakkual ngam nawn lo ding nan. Mindat mipi humhimtu pawl le hriamhreipi nei lo, Lai meithal te thaw lawngin an si fawn, zangfak an um in seherh an um tuk rori.
Chin ramkulh sungih khawpi fate pakhat hiti rorin ralram ah ret in Kawl ralkap suamhmang pawlin an kah hi cu venghnen pengdang pawl khal kan cangvaih a cu zet thlangin a lang. Tuisun ah Matupi lam ihsi khalin Kawl ralkap suamhmang pawl Mawṭawpi 10 khat rorin Mindat lam pan in an feh ti a si.
Tuisun Matupi ihsin Mindat lam pan in a fehtu Kawl ralkap suamhmang pawlih tomi mawṭaw hi mizan, Matupi khawsung mipi ta an laksakmi pawl an si tiah theih a si. Ngelcel ah Mindat le Matupi karlak lamzin a rak min ruangah Mawṭawpi a feh thei nawnlo i, Kawl ralkap suamhmang pawl cu Motorbike thawn feh thotho an tum, lamzin min nak kiang naivai ih ummi khua pawlah lut in khawsungmi pawlih Motorbike khal an laksak huahho men tiin theih a si.
Khawsung ih mi veivak an hmuhmi pohpoh cu an kap a si bik mai, zohman inn leng suak ngam kan um lo. Ziangkhawsawnlo Kawl ralkap pawlin le minung umnak deuh tiih an ruahnak zawnzawn an kap cih men. Mindat khawpi cu Kawl ralkap suamhmang pawl hin hmun thum rori in an do, an kulh thluh a si ko. An kaihmi mino 15 pawl khal Mindat mipi humhimtu (Mipi ralkap) an um ding tiih an zumnak hmun ah an fehpi i an ralkhamnak ah an hmang men, tiin khawsungmi pakhat cun a sim.