ပေါက်မြို့နယ်၊ ကင်းမ khua cu an khaw inn zate deuh thaw in Kawl ralkap pawlin an urkang sak thluh. Innsung ih an tantami kum upa pitar putar le midamlo pawl khal an kang tel cih tiah theih a si.
Mizansun, June 15, sun hnu deuh ah khan Magwe ramṭhen ပေါက်မြို့နယ်၊ ကင်းမ khua cu Kawl ralkap pawlin an luhcilh ih minung umnak inn pawl an urkang sak. Khawsung inn pawl cu sunhnu deuh ihsi khan an kang ciamco ih zan khawthim tiang rori a kang. Innsung ih um kum upa, pitar, putar le damlo pawl, tlansuak cih lohli theilo pawl cu inn kangah an telh cih tiin khawsung mi pakhat cun a sim.
Thu umdan cu hitin a si, Kawl ralkap pawlin ကင်းမ khua an luhcilh ih ṭanhmun an khuar tum. Khawsungmi cakvak deuhdeuh pawl cu an khua suahsan in hramlak ah an tlan thluh, khawsung ah hin hramlak ih tlan thei velo, pitar putar le damlo ṭawnṭai pawl an ei-in ding khawpkham ten an timlam sak hnu ah an tlansan. Cutin khawsungmi pawl an khua suahsan in hramlak ih an tlan sungah Kawl ralkap pawl hin an inn an rak urkang sakmi a si. ကင်းမ khawsen inn zate deuh thaw in a kang.
Kum 36 ih upa khawsungmi pakhat cun “Kan inn kangah ka Pi a kang tel cih. Kawl ralkap pawl kan khawsung an rung lut ding ti kan rak theihcia ruangah kan rak tlan. Kan inn ah ka Pi kan tanta, tuizan hrang a ei ding le thaisun lam hrang a ei ding tiang kan timtuah sak cia. Hramlak ih kan tlansung ah Kawl ralkap pawlin kan inn in rak urkang sak, kan inn kangah ka pi khal a tel, tiin ninghang zetin a sim.
Cakkhai in zamrang ten khawsung kan suahsanmi a si ruangah midamlo ṭhenkhat pawl khal khawsung ah tantami an um. Ni 1, 2 hnu ah khawsung ra luhsal a thei cih mai dingah kan neih, asinan kan ruahbanlopin tuvekin kan khawsen deuh thaw rorin kan khaw inn in urkang sak hi cu an sualral tuk rori si ko, a sungih um minung cawpcilh in an urkang, tiin khawsungmi cun a sim bet.
ကင်းမ khua hi inn 250 hrawng umnak khua a si ih mipum 1,000 hnakih tam an um. Hivekin an khawsen deuh thaw in an inn an urkang sakmi hi khawsungmi pawlih simmi lawng Media cun tarlang a si hrih lai ih, thuthang diksawn le cipciar zet cu theihfiang a si hrih lo. – Chin Net youtube ih tisuahmi Ca ih siar duhtu hrang kan post mi a si.
– Chin Net