Yangon ramțhen Kawhmu peng Magyikan khua nitlaknak lam Caihthaw lamzin ah private motor fate 2 thawn țuanvo neiih suksotu ralkap pawl cu tualsung hriamkai in November 12 zaanlam suimilam 5:00 hrawngah an kap ih ralkap 2 hriamhma nasazet an ngah tiah NUG ih ရန်ကုန်တိုင်းစစ်ဒေသခွဲ ကွပ်ကဲရေးအဖွဲ့ in November 12 ah thusuahnak an nei.
“Private motor 2 thawn an suksomi hngakin kah an si, mi 2 an hngah, an ril tiah kan thei, an thi maw thi lo timi cu fiangten kan thei lo, meithal kah suak dan le a ngah dan zoh tikah mi 2 cu an hriamhma a nasazet, hi hnakin an tam tla a si thei” tiah ရန်ကုန်တိုင်း စစ်ဒေသခွဲ ကွပ်ကဲရေးအဖွဲ့ ih News & Information director cun simnak a nei.
ရန်ကုန်တိုင်း စစ်ဒေသခွဲ ကွပ်ကဲရေးအဖွဲ့ cun “ပျံလွှားအောင်” doawknak timi hminbun in Yangon ramțhen sungih ralkap pawl cu an do rero ih, tuițum doawknak țheh hnuah hriamhrei neilo kiangkap minung kai tahratih that ciamco loin hriamhreikai veve doawk dingah ralkap cu theihternak an tuah.
Hi doawknak thluh hnu khalah ralkap pawl cun kiangkap ih mipi pawl an kaih ciamco thei ruangah mipi lam ralringten um dingah ရန်ကုန်တိုင်းစစ်ဒေသခွဲ ကွပ်ကဲရေးအဖွဲ့ cun zangfah dilin ralrinnak an pe.
November 5 khalah Yangon ramțhen Kunchiankung peng Inkalung khua kiang lamzin ih suksotu ralkap motor pakhat cu ရန်ကုန်တိုင်းစစ်ဒေသခွဲ ကွပ်ကဲရေးအဖွဲ့ cun an kap ih ralkap 7 an thi ih mi 13 hriamhma a ngah thu, hriamhma ngahtu lak ihsin mi 4 an thih bet thu theih a si.
