Sagaing ramțhen Katha peng sungih ralkap pawl cu November 17 zaanlam suimilam 4:00 hrawngah KIA le PDF in an rak do ih ralkap 3 an thi tiah theih a si.
Katha peng Mutha khua ihsin Chawngwa lam ih ra fehtu ralkap pawl cu KIA le PDF țangkop ih an rak do ruangah ralkap 3 an thih thu hmin tarlang duh lo mi pakhat in a sim.
“Ralkap 3 an thi timi cu a fiang ko, hriamhreipi kaptu an siih, an tho thei nawn lo, hi hnakin a tam sawn men thei” tiah a sim. Hi doawknak cu nazi pakhat an rei ih PDF sungtel pakhat cu ralkap pawlih hriamhreipi kahmi cun a kawng ah a ngah ih a hriamhma tuarmi cu thlaphan um a si lo tiah a sim bet.
Sagaing ramțhen Katha peng ah October thla ihsin doawknak a nasazet ih Nantsing khua, Supukkung khua le Mutha khua ihsin mipi pawl cu November 16 ah khua an suahsan sal thu tualsungmi pawl hnenin theih a si.
Katha peng Yiphyugone kiang khalah November 10 ah doawknak a suak ih ralkap 5 an thi, KIA lam ihsin mi pakhat a thi tiah theih a si.
