Tuisun, May 25, khal Karenni ram ဒီမော့ဆို peng cu hmun tin deuh thaw ah doawknak nasa zet a um, Kawl ralkap suamhmang lam siseh Karenni PDF lam khal siseh hriamhma tuar le mithi an tam ti a si. Tuizing vangpawl hrawng ihsin ဒီမော့ဆို khawpi le လွိုင်ကော် khawpi kiangkap ah Kawl ralkap suamhmang le Karenni PDF pawl doawk an thawk. Tuizing an doawknak ah hin Karenni PDF lam mi pahnih in nunnak an liam, Kawl ralkap suamhmang lam khal an raldonak mawṭawpi pahnih cu Karenni PDF pawlin Bomb in an puah siatsak ih mithi le hriamhma tuar tampi an um, tiin PDF lam cun an sim.
Himi thuthang kan tawlrel rero lai tiangah hin nasa zetin an kap aw. လွိုင်ကော် khawpi kiang ဒေါတမငယ်၊ ငွေတောင်၊ ပန်ကန်း၊ ဒေါငံခါး tipawl ah doawknak a rapthlak zet, Kawl ralkap suamhmang lam hin hmun hlapi kahnak hriamhreipi, raldonak mawṭawpi, Helicopter le hriamhreipi a phunphun thawn nasa zetin an do.
Hivekin Kawl ralkap suamhmang pawlin Leipar doawknak hriamhreipi pawl an neih zat suah in nasa zetih an do ruangah Karenni PDF pawl cun hmun dang ihsin Mawṭaw le Tank tipawl ra lut thei nawnlo dingin lamzin an phit, thing pawl an hau thlu, a phunphun in an rak kham aw ve.
Tuisun Karenni ramkulh ih Kawl ralkap suamhmang le Karenni PDF doawknak hi a nasa tuk lawmam tiin khawsung mi cun an sim. Kawl ralkap suamhmang pawl hin ziangkhawsawn loin khawsung ah duh tawkin hriamhreipi an kap, inn pawl an kap siat men, khawsung mi pa 3 in hriamhma an tuar, hriamhreipi tu le tu an rak kap leuhleuh, tuhi ဒီးမော့ဆို khawpi cu Phone line le Electric pawl khal an phit, tiin KPDF ṭuanvo neitu pakhat cun a sim.
Karenni PDF lam ihsin ram le miphun hrang nunnak liamtu ziang maw zat an um i, Kawl ralkap suamhmang lam khal mithi an tam nasa tiah theih a si. Tufang hi cu an kahawk rero laifang a si ruangah thuhla fiangfel theih a harsa deuh hrih lai.