Karenni PDF cun kahawknak an cawlh hrih ding thu, thusuah an tuah
An thusuahmi ahcun, “Tufang Karenni ramkulh sungah KNDF le Kawl ralkap pawl karlak doawknak ruangah khawpi, khawte ziang maw zat an siat thluh tlun ah ralrelh ih tlantu mipum 100,000 hnakih tam an kim zo. Cuvek dinhmun tiang thleng kan si ruangah Tualsung ih remdaihnak pawlkawm pawl le Biaknak lam hotupawl cun khat lam khat lam doawknak cawl hrih dingin in duhsak. Cuvekin thuhla a um ruangah, KNDF lam ihsi cun remdaihnak tuahtu pawlkom le Biaknak lam hruaitu pawlih fawrhfialnak cu kan cothlang ih Kawl ralkap donak cu alangte sung kan cawl hrih ding.
KNDF cun thuneihnak latu Ralkap suamhmang pawl hi lamzin a phunphun in kan do peh vivo thotho ding. KNDF cun mipi pawl lungrualnak ding le timtuahnak thawn ralringte ih um cio dingin fawrhfialnak an nei. Karenni ramkulh buainak hi Chin Net khalin kan tisuah tam thlang ih Karenni mipi zangfak an um tuk rori. Tuvekin Karenni National Defense Force NKDF pawlin kahcawlhnak an tuah cu fak an um nasa.
Mipi an tuar natsat zia an theihthiamsak ruangah tuvekin kahcawlhnak an tuahmi a si bik ko ding. – Chin Net thuthang ah kimcang zetin ngai ding a um. Ca ih siar duhtu hrang kan post mi a si.
– Chin Net