Tufang Karenni ramkulh doawknak hin thawmvang a nei ring nasa. Hi thu hi Chin Net cun an doawk thawk, May 20 ihsi khan kan rak hnuthlurh ciami a si i, a peh a rung um vivo. Mipi in kan feng theinak dingah a thawknak kha run sim ta ka duh. Ahmaisabik ahcun KNPP timi Karenni miphun ralkap thawn an rak kapaw, Kawl ralkap suamhmang pawl mithi le hriamtuar an tam deuh ruangah Karenni mino 5, san le vang umloin an kai. Curuangah Karenni mino pawl cun anmah le neihmi hriamhrei thawn an rak do thawk, Kawl ralkap lam hin hriamhreipi khal an hmang, cutin an doawknak a sosang vivo ih hivek dinhmun tiang an thlennak a si.
Karenni kan timi, Kaya ramkulh hi kan theihfiang theinak dingah, Shan ramkulh le Karen ramkulh karlak ih ummi a si. An saklam ah Shan an um i, an thlanglam ah Karen an um. An doawknak thu kan rel tikah khui maw can ah Karen thawn an ramri, tican a um ding i, khui maw caan ah Shan thawn an ramri ticaan a um ding, mipi lam kan feng theinak dingah kan sim hmaisa duh.
မိုးဗြဲ Palik sakhan an siim ih Kawl ralkap suamhmang 14 an kap that tlun ah an sakhan an laksak bet.
May 23, Manisun zinglam nazi 9 luan deuh hrawng ihsi khan Shan ramkulh thlang lam, ဖယ်ခုံမြို့နယ် မိုးဗြဲ Palik sakhan cu People’s Defense Force (PDF) pawl le Tualsung tlangpar miphun hriamkai pawl kawm aw in an va siim, nasa zetih an kahawk hnu ah Kawl ralkap suamhmang pawlih ṭanhmun khuarnak sakhan an laksak, an doawknak ah hin Palik sakhan sungih ṭanhmun khuar in PDF pawl rak kap rero tu Palik bawipi (ဒု-ရဲအုပ်) telin Palik pa 4 le Ralkap pa 10 an zaten 14 rori an kap that tiin မိုးဗြဲ PDF cun thusuah an tuah.
ဒု-ရဲအုပ် PDF ṭuanvo neitu pakhat cun “Kawl ralkap pawlih ṭanhmun khuarnak sakhan hi sunhnu deuh zanlam nazi 1:30 hrawngah azaten kan la thluh thei. Zanlam nazi pakhat hrawngah an sakhan kan lak thluh deuh lomi malte a taang ih an kut ken meithal thlah in a ra luttu minung 2 an um, Sakhan sungah an kut kaih meithal thlah duh cuanglo ih rak umtu Ralkap le Palik an zaten mi 15 hrawng an um, cupawl khal Sakhan sungah an thi thluh.
An ṭanhmun khuarnak Palik sakhan hi meisa in kan urkang sak thluh hnu ah Palik le ralkap an nunglai ih kaihmi khal kan nei, tiin a sim.
An doawknak ah hin Kawl ralkap suamhmang lam mithi an tam bangin PDF lam khal bomb pal ngah ruangah mi pakhat nunnak a liam ih mi 4 in hriamhma an tuar tiah theih a si. Manisun an doawknak cu a rorum nasa, sundir rori ah PDF pawlin an sakhan an va lak sak rupro cu an ral a ṭha in uar an um nasa. An doawk thu thawn pehpar in RFA cun thuhla cipciar sut dingin Tualthat acozah ralkap thuphuang tu ဗိုလ်ချုပ် ဇော်မင်းထွန်း cu Phone in an be tum nan, pehtlai a theih lo.