Entertainment huangchhung a chanchin ngah ber pawl Rapper leh entrepreneur, Kanye West chu Bianca Censori nen a rukin private ceremony a an inneih thu puan a ni a, hei hi a nupui hlui Kim Kardashian nen an inthenna an tihfel hnu thla 2 na ah chiah a ni.
Khawthlang milar chanchinthar lakhawm tu TMZ in an tarlan dan chuan an inneihna hi tumah dang in an hriatpui lem lo an ti a, Bianca hi Yeezy ah architectural designer in hun eng emaw chen hna alo thawk tawh thin. An innei ngei a ni tih tirinawm zual turin Kanye West chuan an chhuahna ah inneih zungbun ni a hriat a bunchhuak lai hmuh a nih thu an sawi bawk.
Amaherawh chu an inneihna hi private tak a kalpui a nih vangin dan ang taka pawm theih turin marriage certificate engmah an la thehlut lo thung.
Kanye hi American reality television star, Kim Kardashian nen a hma in an innei. Kim leh Kanye te hi 2011 atang a inkawp tan in 2013 ah an fa hmasa ber an nei a, fa an neih hnu 2014 ah an innei. An inneih chhung in fa 4 an nei hman a, hunrei fe an nupa thutiam an vawnhim hnu ah February 2021 khan Kim K hian official takin inthenna tur a thehlut. Mahsela November 2022 ah an inthenna hi a hmawr bawk fel a ni ta chauh.
Tuna Kanye nupui thar a sawi Bianca Censori hi Melbourne, Australia a seilian niin Architecture ah degree hmuh a tum a, kum 2020 ah Kanye brand Yeezy ah hian hna a thawk tan a ni.
