Rapper boruak nei lian tak Kanye West leh a nupui hlui Reality star, Kim Kardashian te chuan an inthenna chungchang ah a hmawr an bawk fel thei ta a, an fate 4 enkawl chungchang ah inremna an nei a ni.
Kim K leh Ye te inremna ah hian Kanye West hian a nupui hlui hnen ah hian thla tin pawisa a pek a ngai dawn a, an fate enkawl na ah hian thuneihna in zat ve ve an nei ang a, Ye hian $200,000 (£167,000) a pe ziah ang ti in thu an rem.
Kim Kardashian kum 2021 khan kum 7 zet pasal atan a neih tawh Ye thenna tur hi a thehlut a, March thla ah dan ang takin a ‘single’ tih puan a ni bawk a, a hming tawp a Ye hming a tawm ‘West’ tih a paih bawk.
An nupa hi milar nupa zinga thawm nei lian ber pawl niin an chanchin hian mite ngaihven an hlawh hle. Buaina leh an nupa kar chhiat chhan hi Kanye West an United President a chuh lai vel in a ni a, vantlang hriat ah an nupa kar chungchang thil tam tak a sawichhuak a, a nupui mai bakah a chhungte thleng in a sawi kai.
Kim-i hian a pasal thil sawi tam tak chungchang ah Ye chu natna bipolar disorder a vei tih a sawi hial bawk. Heta tang hian an nupa kar hi a hma angin a nghet thei tawh lo a, khi chat chu zau zel in an inthen phah ta hial a ni.
Tin, Kanye West hi mi danglam leh mize mak tak nei a ni. Hmanni lawk ah Twitter a Juda pawi a sawi vangin a Twitter account khawih theih lovin an hrem. Tesla neitu Elon Musk a’n Twitter a lei hnu ah Kanye West account hi tihnun a ni leh a, mahse Ye hian Twittter dan bawhchhe nawn lehin a account an suspend sak leh a ni.
Interview ah Hitler-a fakna chungchang a sawi a, Twitter ah Nazi pawl chhinchhiahna Z letling kawkalh chu post in a hnu lawkah a account hi an hrem. Elon Musk chuan Ye hi tharum thawhna lam hawi a midang tiphur thei zawnga a che hi enliam theih a nilo tih a sawi.
