Plastic surgery hi mitam takin hmelthat leh lan mawi nan an hmang a, mahse a fuh loh erawh chuan thil pawi tak a thlen phah thei chawk ani.
Kannada TV actress pakhat kum 21 leka upa Chethana Raj chu cosmetic surgery a neih hnu ah vanduaithlak takin a nunna a chan zui tih hriat a ni a, he thil thleng duhawmlo tak ah hian tuartu chhungte lam hian damdawiin lam te thiam loh ah puhin an lungawilo viau bawk.
Tarlan dan in May 16 khan Chethana Raj hi Bengaluru a private damdawiin ah a thau lutuk ti ziaawm tur leh nalh taka a lan theih nan ‘fat free’ surgery a nei. Mahse surgery neih hnu reilo ah a hriselna ah nghawng neiin insawiselna a nei zui ta ani.
A chuap ah tui a tling niin an sawi a, hei hian a thawk lamah harsatna a thlen a, a boral phah an ti. Report thenkhat in a tarlan ah chuan nunna chan ta Chethana Raj hian surgery a neih tur chungchang hi a nu leh pa te bulah a hrilh hre miah lo a,a thiante nen cosmetic surgery nei tur hian damdawiin ah kalin a duhthlanna in thutlukna hi a siam thu an sawi.
Chethana nu leh pa te erawh chuan an fanu thihna hi surgery ti tu doctor thiamloh leh fimkhur loh vangah an puh a, ruang hi post mortem tura tih niin tuartu nu leh pa te hian damdawiin lakah hian thubuai an ziaklut a Police ten thil thleng hi investigation an nei mek ani.
Chethana Raj hi Kannada serials lar tak tak ‘Geetha Doresaani’ leh ‘Olavina Nildana’ ah te changin Kannada movie ‘Havayaami’ ah a inlan bawk. Hma hun eng tak a neih laia a chunga vanduaina thleng hi a lainatawm hle mai.
