Kani peng le ယင်းမာပင် peng doawknak ah tualsung PDF le Kawl ralkap nasa zetin an kapaw ih Kawl ralkap 20 hnakih tam an thi.
June 22 sun, simlam nazi 2:30 hrawngah khan a si, Sagain ramṭhen Kani peng le ယင်းမာပင် peng ramri tluan ih ummi khua pawl ah Kawl ralkap suamhmang pawl le tualsung PDF pawl nasa zetin an kapaw ciamco, zingpit te ihsin an kapaw thawk, tualsung PDF lam hin Bomb thawn an kap, ralkap pawl mawṭaw tla bomb an puah siat sak, nasa zetin an kapaw, Kawl ralkap lam mi 20 hnakih tam an thi, tiah theih a si.
Kawl ralkap pawl hi ယင်းမာပင် peng တရော်ကျင်း khua ah ṭanhmun khuar tum ih ra luttu Kawl ralkap pawl cu tualsung PDF pawlin an rak bawhthup ih nasa zetin hmun le hmun ah an rak kah ciamco. Kan kahawknak hmun hi Kani le ယင်းမာပင် ramri ah a si ko, Kawl ralkap mipum 50 pawl cu ယင်းမာပင် peng တရော်ကျင်း timi khua ah ṭanhmun khuar tum in mawṭawpi pahnih in an ra. Khawsungmi pawl cun an khawsung ih Ralkap pawl ṭanhmun khuar ding cu an cohlang lo, sunhnu nazi 2 hrawngah Kani lam tiva kap ihsin တရော်ကျင်း khaw lam kap ta kan hi kap, Kawl ralkap pawl cun in rak kap ve loin khawsung ah an lut, tiin PDF sungtel pakhat cun a sim.
Khawsungmi pawlih duhlo cingin Kawl ralkap pawl cu တရော်ကျင်း khua ih Phungki tlawngah ṭanhmun an khuar, tualsung PDF ṭhenkhat pawl khal an khawlu tlang ah ṭanhmun khuar in nasa zetin an kapaw. Tualsung PDF pawl cu khawveng hnen pawl khalin an bawm ih minung an tam nasa, hivekin tualsung PDF pawl mipum tamzet an suakkhawm ruangah Kawl ralkap pawl hin kap ngam nawnlo in မုံရွာ ih ṭanhmun khuar ralkap dang bawmtu an hi ko. မုံရွာ ihsin ralkah bawm dingin mawṭawpi pa 4 khat rorin mipum tamzet an ra feh rero lai ဘန့်ဘွေး khaw hnar an thlen fangah PDF pawlin Bomb an rak puah ih an rak kah ciamco, Kawl ralkap lam 20 hnakih tam a hmun rori ah an thi.
PDF sungtel pakhat cun “Ralkap mawṭaw a hmaisabik ih ra fehmi Bomb kan rak puah, mawṭaw sungih to ralkap pa 4 cu an parh thluh ih an ruak hman hawlhmuh a har zet ding. Cuvekin mawṭaw hmaisabik feh thei nawnlo in dunglam mawṭaw pawl a kham laifang ah kan kah ciamco. Kan mit hmuh rori ah Kawl ralkap pawl cu kan kap ril rero si ko, zanlam nazi 3 ihsin khawthim tiang rori kan kap aw.
တရော်ကျင်း phungki tlawnginnpi khal kan kap, Kawl ralkap lam mithi an um ding kan zum, ziangzat ti cu kan sim thei lo. တရော်ကျင်း khua ih kan doawk hi khawthim zawng silo sehla cu PDF lam hin ralkap ṭanhmun khuarnak pawl kan laksak thluh thei ding, tualsung mipi kan thazang a tam nasa, mipum 1000 hrawng kan si, Kawl ralkap lam hin in kap ngam nawn lo, an khur thlohthlo a si bik, tiin a sim.
Hivekin Kawl ralkap lam mithi le hriamhma tuar an tam tuk thlangih tualsung hriamkai PDF pawl an neh thei lo ruangah, mawhsualnak neilo khawpi mipi hnen ah cangvai in ဘန့်ဘွေး khua le တရော်ကျင်း khua ih minung umnak inn ṭhenkhat an urkang sak, inn ṭhen khat khal an lucilh ih puarthau zetin khawsungmi pawl parah an cangvai, tiah theih a si.
Kawl ralkap pawl hi ralthuam ṭhaṭha tamzet le ralkap mipum 200 lai cu mawṭawpi thawn မုံရွာ lam ihsin an ra, lamzin tluan ih khua pawl khal an takthak hnawtnak ah an rak kap phah vivo, tiah theih a si. Kan dung tubaite Kani khawpi ihsin peng 37 hlatnak ih tualsung PDf le Kawl ralkap doawknak khalah Kawl ralkap 11 rori an thi ih mi 20 hnakih tam in hriamhma an tuar, ralkap mithi le hriamhma tuar a cekci an theih theinak cu mithi ruak le hriamhma tuar pawl hi phungki tlawngah an rak ret ruangah an rak hmuh ngahmi a si.
June 22 an sun an kahawknak ih ralkap lam ral an sung, mithi le hriamhma tuar an tam ruangah mawhsualnak neilo, hriamhrei kailo khawsungmi parah cangvai in an Vok, Ar, an neih thilri, sui le thil mankhung dang khal an laksak tlun ah an umnak inn tiang an urkang sakmi a si tiah theih a si. – Chin Net youtube ih tisuahmi Ca ih siar duhtu hrang kan post mi a si.
– Chin Net