Sagaing ramțhen Salingyi peng Letpataung hmunram Letkhukpin khua ih ralkap thuneihnak dokalh in duhphorhnak tuahtu nu pakhat ih inn cu zo timi theih lo pawlkom in October 18 zaanțim suimilam 12:00 hrawngah an urkang thu tualsungmi pawlin an sim.
Phawngkața khuami pakhat in “ahmin cu Ma San Win a si, fate unau 6 neimi nuhmei a si, a hnațuan cu tidai zuar ih cawm awmi a si, a harsa ngaingai, atu a Innkangmi khal mi tampi komkhawm ih sak sakmi a si, ziangruangah a urkang timi cu Ma San Win hi ralkap thuneihnak dokalh in nitinten duhphorhnak an tuah ringring, ka sim duh sawn cu ralkap dinpitu pawlin an urkang si ko, kan khua zaten cutin kan zum rori” tiah simnak a nei.
Ma San Win cun a thilri pakhat hman a la suak ngah lo na’n tu hnakin ralkap thuneihnak dokalh dingah thazang cahnak i petu pakhat a si tiah a sim.
“Kan thilri pakhat te hman kan la suak ngah lo, hitin ziangruangah an urkang timi ka sim hlanah September 28 ihsin ralkap hnenih mi zuarthlaitu dalan pawlin in zuar ruangah kan khua pumhlum in khua kan suahsan, October 16 khalah cam khatte kan inn ka va tlun duat ah khan dalan pawlin ralkap hnenah in zuar bet ruangah kan inn an rak hawl rero, keimah cu ka tlansuak ngah ruangah ka him fangfang, duhphorhnak tuahtu pawl nitin an hawl ih ralkap dinpitu pawlin an urkang si bik” tiah Ma San Win in a sim.
Letpataung hmunram Phawngkața khua cu ralkap in rampi thuneihnak an lak ni ihsin tuini tiang ralkap thuneihnak dokalh in sunzaan rori an cangvai ih duhphorhnak thazang a țhat zetnak khua pakhat a si tiah tualsung mi pawlih simnak vekin theih a si.
