Sagaing ramțhen Kalay peng nitlaknak saklam hmunram ih rittheisii zuartu minung 3 cu Kalay PDF in an kap that tiah theih a si.
November 22 zaanlam suimilam 3:30 hrawngah Kalay peng Pyidawtha khua ih inn pakhat ah Kalay PDF sungtel minung 6 cu an lut ih inntek nupa cu an kah that hnuah an suaksal tiah theih a si.
Kum 36 mi inntekpa cu tuihlan ih rittheisii a rak zuar ruangah kum 2 sung thawngtla zotu khal a si. An ruak cu November 22 zaanlam ah an vui cih ih, fate unau 4 (mipa 2, nunau 2) an tansan tiah theih a si.
Cuihleiah November 7 khalah Pyidawtha khua nisuahnak lam Nanchawng khua ih rittheisii zuartu kum 37 mi mipa pakhat cu Kalay PDF in zaan suimilam 7:30 hrawngah inn ihsin khua leng ah an hruai hnuah an kap that ih a ruak cu khuami pawlin a zaanzaan in an vui cih tiah theih a si.
Tuihlan ah hi rittheihsi zuartu cun ralkap pawlin in zuarter, in kai asile khua pumhlum in ka urkang ding, ralkap pawl ka ko cih ding tiah khuami pawl cu a hringhro rero dah zo tiah theih a si.
Kalay PDF cun October thla ihsin Kalay peng sung rittheisii zuartu le hmangtu pawl cu ralrin peknak ca an rak suah zo.
Zalen
