Sagaing ramțhen Kalay peng ah mipi hmanmi motor thawn a feh rerotu ralkap council hriamkai minung 8 cu Kalay PDF ih bomb puak ah an thih thu Kalay PDF in thuthannak an nei.
September 25 sundir suimilam 12:00 hrawngah bike 5 le thilri phur motor (ကုန်တင်ကား) 4 thawn thlanglam ihsin Kalay khawpi pantu ralkap council hriamkai pawl cu Chinsaing khua kiang tlangleng zin lan zawngah Kalay PDF cun bomb thawn an do ih bike 3 le motor 1 a siat ih bike mawngtu ralkap 3 le motor totu ralkap 5 an thi tiah theih a si.
Bomb puak thluh hnuah ralkap pawl cu Chinsaing khua lamah tlan phah in meithal an kap ciamco ih bomb ih ngahmi motor le bike pawl cu tansan tahratin motor dang ahcun mithi pawl an phur ih Kalay khawpi ah an tlan lut thu Kalay PDF cun thuthannak an nei.
