November 14 ah Sagaing ramțhen Kalay khawpi sung hmun 2 ah siseh, Sekan khua nitlaknak lam Chin ramkulh sung khalah siseh bomb puak thawmvang theih a siih, Myittha tipi nisuahnak lam Uhyin khua inn pakhat khal a kang tiah tualsungmi pawl hnenin theih a si.
Kalay khawpi Tahan veng Wesly siizung lamzin ih ralkap pawl hmunkhuarnak inn cu bomb an denglut ih ralkap pakhat a thi tiah theih a si. Cuihleiah Aungmingalar veng Sakhahla phungki tlawng thlanglam lamzin khalah bomb a puak ih electric meisa hri a cat tiah theih a si.
Kalay University thlanglam Chin ramkulh sungah November 14 zaanlam suimilam 1:00 hrawng ihsin hriamhreipi kah thawmvang vei 15 hnakih tam theih a si thu kiangkap ih um Sekan khuami pawl hnenin theih a si. Curuangah khawsen deuh thaw in khawpi sungah an tlan tiah theih a si.
Myittha tipi nisuahnak lam Uhyin khua khalah November 14 zaanlam ah ralkap pawl cun inn pakhat an urkang tiah theih a si. Ralkap pawl cu November 13 ihsin khawsung lut ih hmun an khuar ruangah kiangkap ih um Inkyaw khuami pawl khal himnak hawlin an tlansuak tiah theih a si.
Ref. : Zalen
