Sagaing ramțhen Kalay khawpi Chanmyaaungsii veng ih um mino 6 cu September 16 ah ralkap in an kaih thu theih a si.
Kaih tongtu pawl cu ကိုတုန်တုန်၊ ကိုဂျီဝမ်း၊ ကိုစစ်ရိပ်၊ ကျီရမ်း an siih a dang mi 2 cu theih an si hrih lo.
Annih pawl cu Chanmyaaungsii veng ih inn ah an um laifang zinglam suimilam 6:30 hrawngah ralkap pawl cu motor 3 thawn ra tahratin an kai tiah mit ih hmutu pawlin an sim.
Hi mino kaihmi pawl cu myoma palik zung ah an hruai ih ziangruangah an kai timi theih a si hrih lo.
Ralkap pawl cun Chanmyaaungsii veng hleiah Pinlong veng Sin-kyar lamzin tluan ih inn pawl khalah an lut ih mi an hawl vivo tiah tualsungmi pawlin an sim.
Kalay khawpi ah September 3 ih an kaihmi mino 3 khal tuini tiang an thlah hrih lo tiah theih a si.
August 26 khalah tapik sakhan țhekdarh tahratin ကိုလင်းလင်း၊ ကိုပြားလေး (ခ) ကိုသိန်းနိုင်ထူး၊ မနေခြည်နွေးနွေးဦး၊ မမို့မို့လင်း၊ မဇင်မိုးခိုင်၊ မငယ် (ခ) မအေးငယ်၊ မယုမော်ထွေး၊ ကိုနန်းဦး pawl an rak kai. Annih pawl cu yazatetgyi pukmah 505 (a) hmangin thubuai an tuahsak ih Mawleik thawnginn ah an kuat thu an sungkua pawlin an sim.
Kalay khawpi ah ralkap thuneihnak duh lo langternak lamzawh cu tuini tiang thazang a cak zet lai ih February 1 ih ralkap in rampi thuneihnak a lak hnu duhphorhnak cangvaitu pawl meithal ih an rak kah ruangah minung 50 lenglo an thi ih, mi 100 lenglo kaih an tong tiah duhphorh cangvainak hotu pawlin an sim.
