Hollywood nupa lar ber te zinga mi, an inthen hnu a buaina nei zui mek ‘Pirates of the Caribbean’ actor Johnny Depp leh Amber Heard te chu defamation case chungchang ah Fairfax Court ah an inkhing mek.
Thu tam tak sawichhuak in thu hretu te an dingchhuak bawk a. Court chhunga trial neih ah Johnny Depp hi thusawina hun pek a ni a, a nupui hlui Amber Heard in kutthlak thin leh a chunga rawng taka che thin a a puhna ah Johnny Depp hi pha in Amber hi kut a thlak loh thu leh hmeichhia hrim hrim chungah tharum thawh zawngin a chet ngai loh thu a sawi.
Johnny Depp hian a sawidan in Amber Heard nen intihbuaina an neih chang pawh in a kianga ala awm tlat chhan chu vau beh a nih thin vang niin a sawi bawk a. Amber hian mahni intihhlum ah vawi tam vau in Depp chuan Amber hi a nu anga intihhlum a tum mai ang tih a hlauh luat ah a laka mawilo taka a che chung pawn a zawldawh zawka a tan thin thu a sawi ani.
“Vawi tam chhuahsan ka tum a, mahse elevator ah security guards te nen min dang zawk ani. Tap chung in a au a, ‘i tello chuan ka nung thei lo. A nih loh chuan ka thi zawk mai ang’ a ti . Depp chuan vawi khat a chhuahsan tum in Amber hian reilo ah a chenna in ah hian a kalchilh a. A in hma lama parking lot ah te au in a nungchang chu mak tak leh thunun theih a nih loh thu a sawi bawk.
Nilaini a Johnny Depp an Court chhunga thu a sawi lai hian Amber Heard hi a pasal in a chungchang a sawi dan ah a lawm lo tih a hmel atang in a hriat theih thu an sawi a. Depp leh Amber te nupa inkar buaina trial hi chawlhkar 6 vel awh tur a ni a, Amber Heard pawh thusawina hun pek a ni ang.
2018 khan Amber Heard hian Washington Post hnen ah a pasal hming sawilang dawt lovin tharum thawhna tuar nasa tak leh chumi atang a damkhawchhuak angin khawngaihthlak takin a insawi a, hei vang hian Depp pawh mitam takin an dem nasat phah hle.
Amber thusawi ah hian lungawi lovin $50 million hmangin a lakah intihhmingchhiat tumna defamation case file in a khing a, Depp hian thudik tak hailan chu a thil duh ber a ni tih thuneitu te hnen ah a sawi bawk.
