WWE star leh Actor lar tak ni bawk John Cena leh a nupui Shay Shariatzadeh te chu a vawihnihna atan inneihna buatsaih in thutiamna hun an nei tha leh.
Zirtawpni khan John Cena leh Shay Shariatzadeh te hi Canada a Vancouver Club ah innei tura mo thuam nen an inlan hmuh an ni a, TMZ chuan inneih vawihnihna a thlen leh thu tarlang in an thian leh chhunghnai ten an telpui thu an puang.
Innei tura an inbuatsaihna hi a rei tawh hle a, mahsela hripui leng mek pandemic vangin an ruahman ang in an kaltlangpui thei lawk lo zawk a ni. Mahse nikum October 12 khan Tampa, Florida a attorney office ah a vawikhat nan mawlmang takin an lo innei tawh.
Canada ram hi an pahnih tan ve ve hmun pawimawh tak a ni a, Shay seilenna ram niin an intawnna a ni bawk. John Cena hian ‘Playing With Fire’ a buaipui lai March 2019 khan Vancouver ah Shay nen hian dinner date neia an chhuak hmuh an nih hnu in an inngaihzawn thu media ten an puangzar.
John Cena hian Entertainment Tonight hnen a an Movie chungchang a sawi ah “He movie hi ka tan a pawimawh a, hma hun lo awm zel turah pawh he movie hian hriat reng tlak thil min hnuchhiah tawh dawn a ni. A chhan chu mi bik tak ka tawnna a ni tlat” tiin a sawichhuak a ni.
