Elon Musk hi khawvel a mi hausa ber a ni a, milar te sum dinhmun endik sak thin tu Forbes in annual list a tihchhuah ah pawh pakhatna bawk a hauh leh ani.
Forbes list tihchhuah thar ah hian kum 50 a upa Elon Musk hausakna hi $282billion zet in chhutsak a ni a, pahnihna a awm Amazon neitu pa Jeff Bezos nena an sum neihzat hi a inthlau viau bawk. Jeff Bezos ai hian Elon Musk hi $100 Billion zetin a hausa tawh zawk a, Bezos hausakna hi tunah $183.6billion ani.
Tesla leh SpaceX CEO hi Covid-19 pandemic vanga khawvel a buai mup mup khan a ni erawh sum lamah nasa takin hma a sawn thung. 2020 kum tir lam ah kha chuan Elon Musk hian $26.6billion chauh ala nei. Mahse a hnu lawk ah $110billion a kai dawr a, Forbes ngei pawh in a hausakna pungchak tak hi tunhma in ala thleng lo an ti hial.
2021 a herchhuah meuh chuan $90billion in a sum a rawn belhchhah leh a, Forbes rich list ah a ber nihna atangin Bezos a nekchhuak ani.
Khawvela hausa ber pathumna ni mek LVMH CEO Bernard Arnault aiin Elon Musk hi $115billion in a hausa zawk a, Bernard Arnault hausakna hi $167.4billion in Forbes in a chhut.
Heti khawp hian Musk hi hausa in a neinung a, mahse a sum neih te hi a chen huau huau ringawt lo. Midang te tan malsawmna ni turin theihtawp a chhuah ve bawk a, society a donation pe turin Giving Pledge ah a sign hnan bawk.
A sum neih atanga chhut in Elon Musk hian North American sports leagues lian 4 a team tin te a lei fai vek thei dawn. 32 National Football League teams ah hian $112billion vel a hmang ang. 30 NBA teams lei nan $61billion, 30 Major League Baseball teams ah $54billion leh 32 National Hockey League teams lei nan $26.7billion vel bawr seng tur angin hisap chhin ani.
Musk hi Twitter a shareholder neitu lian ber a ni mek bawk a. Tunhnai lawk khan social media company ah hian 9.2 per cent stake a lei bawk ani.
Forbes in khawvela mi hausa zual 10 a tarchhuah te:-
1. Elon Musk, $282billion
2. Jeff Bezos, $183.6billion
3. Bernard Arnault, $167.4billion
4. Bill Gates, $134.2billion
5. Warren Buffet, $127.3billion
6. Larry Page, $113.4billion
7. Larry Ellison, $113billion
8. Gautam Adani, $112.9billion
9. Sergey Brin, $109billion
10. Mukesh Ambani, $99.6billion
