Rinna hi a dik lo zawng a kalpui a nih chuan thil hlauhawm tak a ni thei. Mozambique a pastor pakhat chu Bible a Isua Krista thil tih nia sawite entawn tumin ni 40 chhung chaw leh tui nghei a tum hnuah a thi niin an tarlang.
Santa Trindade Evangelical Church dintu kum 39 mi Francisco Barajah hian Isua theih ang chu ti thei ve tura inngaihna a nei a, ni 40 chaw nghei a tum atang in a hriselna chuan nasa takin a tuar phah a ni.
Ni 25 chaw a nghei hnu ah a rihna a hloh nasa hle a, mahni a ding thei lo hial khawp in chakna reng a nei tawh lo. A dinhmun a that loh zel vang hian Beira a damdawiin ah hruai a ni.
Damdawiin a a dinhmun an enfiah ah chuan acute anaemia a vei tih an hmu a, a kawchhung lam organs alo chhe nasa tawh a, Doctor te pawhin a nunna an chhanhim sak thei lo.
Pastor hi Zimbabwe ramri, Central province Manica-a Messica khawpuiah French zirtirtu a ni bawk. Santa Trindade Kohhran member te chuan Pastor leh a hnungzuitute chaw nghei chu thil awmdan pangngai a nih thu an sawi a, mahse hetiang em em a rei a ni ngai lo.
A unaupa Marques Manuel Barajah chuan pastor hian chaw chu a nghei ngei tih sawiin, mahse a thihna chungchangah medical diagnosis chu a kalh thung a. A unaupa hi a blood pressure a hniam thu a sawi a ni.
Tun hi chanchin tha Matthaia ziak ang a thlalera ni 40 chhung Krista chaw nghei entawn tumna vanga thihna thleng hmasa ber a ni tawh lo. Kum 2015 khan Zimbabwe mi pakhat chu ni 30 chaw nghei hnuah a thi niin tualchhung media te chuan an sawi. Kum 2006 khan British a London ah pawh rinna chungchang a rei tak chaw nghei vang in hmeichhe pakhat a thi tih hriat a ni bawk.
