Interpol timi kawhmi International Criminal Police Force ih a țum 89-nak Conference ah Myanmar ralkap council an sawmnak cu ruatsal dingah NUG cun dilnak an nei.
November 23 – 25 tiang Turkey ram ih tuah dingmi Interpol conference ah milai covo pahbalnak thawn mawhphurh pekmi ralkap council ih palik hotu Lt. Gen. Than Hlaing an kai ding tiah theih a si.
Daw Aung San Suu Kyi hruainak ih hrilawknak ih tlingtu mipi acozah cu phial tahratin ralkap in rampi thuneihnak an lak hnu ih ralkap council palik hotu le ramsung Deputy Minister an retmi Lt. Gen. Than Hlaing cu Interpol conference ah online ihsin a kai ding thu Myanmar Police Force ih thuthang pakhat in a sim.
Interpol ih hnațuannak 3 ah ralhrang dokalhnak khal a telih ralkap council cu ralhrang pawlkom pakhat an si thu Interpol in ralrin ding a tha tiah NUG ih Ministry Of Foreign department ih Deputy Minister U Moe Zaw Oo in simnak a nei.
“Interpol ih daanhrampi pukmah 2/1 ah International human right pehtlaih tarlangmi vekin hrambun a si tiah sim a si ruangah ralkap council palai cohlan hi milai covo lam ihsin zoh asile ziangtin a si thei timi ruahsal a țha” tiah Minister U Moe Zaw Oo in a sim.
Cuihleiah Interpol ih ramkhel thuhla ah lamțang nei lo ding ti a si ruangah ralkap council cohlan hi ramkhel vek asile a dik ngaingai maw timi ruahsal a țha tiah Minister U Moe Zaw Oo in a sim bet.
Canada, EU, British le American pawlih hremnak pekmi ralkap council hotu pawl ah rampi thuneihnak lakmi duh loin duhphorhnak tuahtu mipi pawl cu meithal thawn țhekdarhnak le mi 1000 lenglo kai tahratih thahnak ah a hleice ih hohatu palik hotu Lt. Gen. Than Hlaing khal a tel.
Lt. Gen. Than Hlaing thawn pehparin thianghlim ten duhphorhnak tuahtu mipi pawl cu palik ih meithal thawn țhekdarhnak ah thutluknak tuahtu bik a siih, Myanmar ram ih milai covo pahbalnak ah țuanvo neitu a si tiah EU cun hremnak pekmi pawl thusuahmi ah an tarlang.
“Humhimnak le remdaihnak cu hringhro ih cangvaihnak pawl telin Myanmar ram dik tek ukawknak le democracy tlakniamnak pawl cangvaitu ah Lt. Gen. Than Hlaing khal a tel tiah EU cun an sim.
International daan pahbalnak pawl a um tiah mipi pawlkom pawlih an mawhphurhmi Chin ramkulh le Sagaing ramțhen ah ralkap council cun Anawyathar doawknak timi hmin bun in hmahruaitu bik cu Lt. Gen. Than Hlaing a si.
Interpol ah EU sungtel ram pawl hnațuannak General Secretary office khal France ah a um ih General Secretary hi Jurgen Stock a siih German miphun a si.
Interpol Conference ah ralkap council palai kai ding thuhla ah NUG thawn reltlangnak a um le um lo cu Interpol General Secretary suh a si ko na’n zianghman simmi a nei lo.
Interpol conference tuahnak ding Turkey ram ih Interpol department ih palik bawi pakhat cun Lt. Gen. Than Hlaing a kai ding thuhla ah a dikmi a si thu, elnak tuah loin thusuhnak pawl cu bulpak thawn pehparmi a si tiah a let.
Interpol cun ralkap council a theihpi maw theihpi lo timi thusuhnak ah Myanmar ram cu sungtel ram pakhat a si, asina’n ramkhel thuhla ahcun ka thei lo tiah palik bawi cun a sim.
Interpol feh dan vek asile Myanmar ram palik hotu Lt. Gen. Than Hlaing hi Myanmar ram ih Interpol department ah upa khal a si. Interpol cun Myanmar ralkap council theihpinak le conference cu Myanmar ralkap council palai a kai ding timi ah evidence hmuh ding a um lo.
Leitlun ram 194 telmi Interpol cu leitlun ram kip palik hnațuannak ah komkhawm aw ih dinmi a siih Interpol ih hnațuannak pawl cu thuhla zinzoinak lam a si.
—————
