Innsang ei-in hawl in hramlak ih Pa hawltu nunau pahnih an pawngsual thu theih a si.
Shan ramkulh saklam မန်တုံ pengsung ih um Lesu miphun nunau pahnih cu an sungkua ei-in ding hawlin hramlak ih Pa an hawl lai cu June 14 sun ah khan Kawl ralkap suamhmang pawlin an pawngsual tiah tualsungmi hnen ihsin theih a si. Kawl ralkap pawlih an pawngsualmi Lesu miphun nunau pahnih hi pakhat sawn cu kum 26 ih upa nupinu a si ih pakhat sawn cu kum 20 hrawngih upa fala a si.
မန်တုံ khawpi ih um mi pakhat cun “Hivek thil thlengmi cu nunau pawl hrangah himnak a um nawnlo. Hi thilcang thawn pehpar in tifelsak ding bawmnak an ṭul zet, tu hrih ahcun pawngsual a tawngtu nunau pahnih hi an himnak hrang ruat in hmun fianhrial ah ret hrih an si” tiin a sim.
Kawl ralkap in Lesu nunau pahnih an pawngsualnak hmun hi မန်တုံ khawpi ihsin peng 8 hrawng hlatnak hramlak ah a si thu, pawngsual a tawngtu nunau pahnih bawmtu mi pakhat cun a sim. Pawngsualtu ralkap hi minung pakhat lawng a si tiin an sim ih Kawl ralkap ziang battalion pawl an si timi cu theihfiang a si lo. Asinan tufang မန်တုံ khawpi ih ṭanhmun khuartu Kawl ralkap battalion (ခလရ) ၁၃၀ pawl an si. Asinan battalion dangdang an thlengaw cingcing tiin an sim.
Shan ramkulh saklam Kutkai peng ah hin kan dung June 10 sun khalah Phungki tlawngih ṭanhmun khuartu Kawl ralkap တပ်မ (၉၉) ih ralkap pakhat cun Phungki nunau kum 13 mi သီလရှင် pakhat a rak pawngsual dah zo. Asinan Kawl ralkap pawl cun kan pawngsuallo a si tiin June 12 sun ah thusuah tuah in an rak phat. – Chin Net youtube ih tisuahmi Ca ih siar duhtu hrang kan post mi a si.
– Chin Net