Khawvel hmun thenkhat ah nupui leh pasal pakhat ai a tam nei te an awm thin a, hriat tlanglawn tak mai thil a ni tawh zawk. Mahse mahni leh mahni innei ‘solgamy’ hi hriattur a awm tho laiin an tam lutuk lo.
Gujarat a nula pakhat kum 24 mi Kshama Bindu chuan India ram a la awm ngai reng reng lo thil danglam tak ching chhuak hmasa tu nih a tum a, amah leh amah chu inneih tumin inbuatsaihna a nei chho mek tih hriat ani.
Kshama Bindu hi Vadodara a khawsa mek a ni a, June 11 hian amah leh amah chu innei dawn in India rama a hmasa ber a ni nghal bawk ang.
Times Of India hnen a a hrilh dan chuan Kshama hian pasal neih chu a duh lo tih a sawi a, amaherawh chu vawikhat pian ve man a monu han nih ve chu a chak tlat si a mahni leh mahni a inneihna hmang turin thutlukna a siam thu hi a sawi ani.
Research a neihna ah India ah hetiang hi tumah an la awm lo tih a hrechhuak leh zel a, mahni inhmangaihna hlut chungchang ah a mei zang hlap tu ber a nihna tur ah hian a phur nasa hle tawh bawk. Gotri temple a urhsun taka a inneihna turah hian thutiam 5 lai a ziak tawh nghe nghe.
Mahni inneihna chu tawp chin nei lova in hmangaihna a ni a, mahni inpawm pumhlumna a nih vang in inneih na dang nen ngaihnep chi a nih loh thu a sawi bawk a, a inneihna hunserh a hman zawh hian Goa lamah chawlhkar 2 chhung chamin honeymoon hman a tum bawk ani.
Mahni leh mahni inneihna hi khawvel hmun hrang hrang ah hriat a ni fo tawh thin a, 2018 khan Uganda nu pakhat Lulu Jemimah chu amah leh amah a innei a, nikum lawk 2021 ah pawh Meg Taylor Morrison chu a bialpa nen an inthen hnu ah amah a innei a inneihna senso ah £1,000 (Rs 1.02 lakh) a hmangral. September 2021 a Brazil nu pakhat amah leh amah innei Cris Galera chu ni 90 hnu ah mi bik tak a nunah a tawn vangin a inthen tih alo puang ani.
