I hmangaih leh i duh em em tan khan engtiang chiah a sang nge i inhuam ve le. Kolkata a cheng kum 65 a upa Tapas Sandilya hian kum 2021 khan a nupui duh tak Indrani chu hripui covid vangin a chan a ni.
Tapas Sandilya hian a nupui Indrani hi a hmangaih in a thlahlel em em a, a boral hnu ah a hriatreng nan a nupui ang chiah chiah milim “silicone statue’ chu siam tirin a chenpui.
A nupui lim siam nan hian cheng nuai 2 aia tam a seng a, a room ngainat tak ah chuan uluk tak a dahtha in mihring damlai ang chiah in sofa ah a thut tir thin. A rihzawng hi 30 kilograms vel a ni a, Assamese silk sari a thuam in, hei hi nu ten an fapa te nupui neihni a an inbel thin a ni.
Time Of India hnen a a hrilh dan in a nupui Indrani hian a boral hun ah amah ang chiah chiah lim siam tura a duh vangin a duhthusam chu a tih puitlin sak thu a sawi. Milim ker thiam tak Sculptor Subimal Das chuan Tapas Sandilya hi a nupui lim siamchhuahna kawngah hian theihtawp in a tanpui.
Indrani lim siam chu a Project khawih tawh a hautak leh khirh khan ber pawl a nih thu sawiin zawhfel nan hian thla 6 chhung zet a rei hun a hmang. Sandilya chuan a nupui duhthusam ah hian a chhungte dang erawh in an pawmpui loh thu a sawi a, milim siam ai chuan in chhunga a thlalak mawi taka tarchhuah chu tawk an ti a, mahse a nupui duhthusam hnuhnung ber hi tih hlawhtlin ngei ngei a duh tih a hrilh a ni.
