Kachin ramkulh Hpakan peng ih um sun Oxygen cetzung cu ralkap council in an long ih mipi pawl Oxygen thun an sian lo ruangah Oxygen cem mangbang awloksong ih an um thu Hpakan khawpi ih zatlang hnațuantu pawl hnen ihsin theih a si.
Hpakan peng sungih Covid – 19 nathrik tuartu zaten Oxygen a țulsammi pawl Oxygen thunsaktu Nan-ma-phit khua ih Oxygen cetzung cu July 25 ah ralkap council in an lon.
Hi cetzung ah ralkap lam ihsin Oxygen ra thuntu pawl lawng thunsak dingah cetzung neitu cu an fial tiah theih a si.
Oxygen thuntu zatlang hnațuan pakhat in “ramțhen ih tumtahnak in tiah Oxygen bur 500 an rak ret, hi bur pawl a khah hlan lo zohman nan thun lo pei tiah ralbawi pakhat in a ti, kannih mi menmen pawl ih Oxygen bur cu kan thun ngam lo” tiah simnak a nei.
Hpakan peng sungih Quarantain Center pawl ah Covid – 19 nathrik tuartu zatel in an um ih, cumi sungah minung 70 lenglo cu Oxygen pek an si tiah Ti-ta-ku Covid – 19 tuamhlawmnak hmun ih hnațuantu pakhat in a sim.
Ralkap ih lonmi Nam-ma-phit khua Oxygen cetzung hi Hpakan khawpi telin Lung-khin, Sik-mu, Ta-ma-khan, Wai-kha-hmaw khua pawlih Covid – 19 nathrik tuar ruangah Oxygen a thunsak hleiah peng 80 hlatnak Moe-kawng khawpi tiang Oxygen țulsammi pawl a thunsak tiah theih a si.
Hpakan khawpi ih Oxygen țulsammi pawl ralkap in hitin thil an tuah tikah Covid – 19 in mithi an tam sinsin thei tiah tuamhlawm-awknak zung ih țuanvo neitu pakhat in a sim.
“Amahlemah a her aw rero zo, ziangruangah hitin thil an ti timi ruah a har nasa, mipi hi thi thluh haiseh timi thawn a bangrep, thilcangmi kan mit rori ih kan hmuh tikah kan tuar thiam lo” tiah țuanvo neitu pakhat cun a sim.
Hpakan peng sung Hpakan, Lungkhin, Sikmu, Tamakhan, Waikhahmaw, Sezin khua pawl ah Covid – 19 a karh tukih nitinten minung tampi in thihnak an tong tiah khuami pawl cun an sim.
