Kachin ramkulh Hpakan peng ah palik senthum pakhat cu November 18 zinglam ah zo timi theih lo hriamkai pawlin meithal thawn an kap that tiah theih a si.
Hpakhan peng Hmawsiiza khua kiangah palik senthum cu zo timi theih lo hriamkai pawlin zaan suimilam 9:00 hrawngah an kap tiah tualsungmi pawlin an sim.
“Palik senthum pakhat a thi, a zaanzaan in ralkap pawl cu a hnok celcel, khawsung an lut, asina’n a kap thattu pawl cu an luat” tiah tualsungmi pakhat in a sim.
Palik senthum cu meithal thawn an kah hnuah ralkap council hriamkai tam zet an ra thleng ih khawsung ah an au ciamco. Palik senthum ih ruak cu siizung ah an fehpi tiah an sim.
Ralkap in rampi thuneihnak an lak hnu Hpakan peng Lungkhin khua palik zung hotu le officer pakhat khal zo timi theih lo pawlkom cun an kai ih tuini tiang an thlah hrih lo tiah theih a si.
Hpakan peng ih ralkap council hriamkai sakhan 3 cu November zarhhnihnak ah KIA le PDF cun an rak kap ih a laksak tiah theih a si.
