A va rapthlak ngai em! Mahni mihring puite chunga hetiang em em a nunrawng a han chet mai chu, a awihawm loh hial zawk a ni.
Hong Kong model leh social media influencer pakhat Abby Choi (28) chu rawng taka tihhlum a ni a, thah a nih mai bakah hian a ruang chu nasa taka suasam niin bung hrang hrang ah a taksa an chan darh a, a taksa bung thenkhat chu refrigerator chhungah an hmuchhuak.
Abby Choi thihna rapthlak hian khawvel a fanchhuak nghal a, a thattu ah hian a pasal hlui chhungte chu puh leh rinhlelh ber an ni. A pasal chhungte nen hian sum leh property chungchang ah buaina neiin an sawi a, hei vang hian rapthlak tak in an tihlum ni a rin a ni.
Police te hian he thihna chungchang ah Abby Choi pasal chhung te 4, a pasal hlui, a nu leh pa bakah a unaupa te thu zawhfiah turin an man nghal. A taksa bung thenkhat hi Lung Mei Tsuen, Hong Kong a a pasal hlui pa te chenna in luah ah hmuhchhuah a ni a, ruang an chan darh nana an hmanraw hman ni ngei a hriat te an hmuh bakah Ms Choi handbag leh credit card te pawh a tel bawk.
A ruang hi soup ah te an theh thang nia hriat a nia, soup pot ah chuan mihring tisa them an hmu bawk. Mahse Choi taksa a ni ngei em tih erawh DNA hmangin an chian phawt dawn. Amaherawh chu a kut, lu leh taksa bung thenkhat hmuh kim ala nilo a, zawn hna thawh mek ala ni.
Ms. Choi hi Thawhlehni atangin chin hriat loh in a bo a, a tuk Nilaini ah Police ten a bo thu hi an dawng a ni. A thihchhan chiang tak hi Police ten chhuihna ngawrh takin an thawk zel a, Zirtawpni khan Tseung Kwan O Chinese Permanent Cemetery dap turin police lam mi 100 chuang tirh an ni a, an zingah hian diving team pawh a bul hnaia tui luanna vel enfiah tura tirh an ni bawk.
Police-te chuan thuthar lakhawm tu te hnenah he inthahna leh pawikhawihna hi ruahmanna ṭha tak siam a chetlakna a ni tih an sawi. Abby Choi hi Modelling khawvel ah hmalam a pan chhoh mek lai a ni a, Elle leh L’Officiel chanchinbu tan pawh alo inlan tawh.
A pasal laka a fa pahnih kal san in,a fate hi a nu enkawl turin a kiang ah dah a nih thu Police te chuan an sawi.
