Hmeichhe naupang lainatawm tak chunga thil thleng vang hian a nunna chhan tum a bei tu Hospital medics te ngei pawh an rilru a na in, an mittui an dang zo bik lo.
Russia in Ukraine a run atang in thil rapthlak leh hmuh hrehawm tak tak a thleng nual a. Pawisawi lo tam tak thisen luangin an nunna an chan tawh a, he hmeichhe naupang pawh hi an awmna Apartment block a Russian bomb in a fuh a, damdawi in a hruai turin ambulance ah rang takin an nawrlut.
Hei hi Pathianni mai a thleng kha a ni a, Ukrainian khawpui pakhat Mariupol ah ani. Unicorn pyjamas ha hmeichhe naupang hi a hming erawh tarlan a nilo. Kum 6 leka upa a ni a, bomb in a den fuhna ah hian a thuamhnaw hak ah te thisen a kai nasa hle bawk.
Medical team te chuan a awm (chest) nem in injection te an pe a, defibrillator hmangin tih harh leh an tum. Ambulance pawn ah a nu ni ngeia hriat chu rilru hrehawm takin thuamhnaw a thisen kai chungin mittui nen hun a hmang a, mahsela hmeichhe naupang hi a nunna an chhan thei ta lo.
A nunna chhan tuma buaipui tu nurse pawh a mittui a tla hial. Doctor chuan Associated Press journalist hnen ah rilru na leh lungchhe zetin pawisawi lo nunna chan mek ah Russia President hming a lamchhuak a. “Putin, he thlalak hi lo thlir mawlh teh” a ti hial ani.
Ukraine hian Russia in a rûn atang in civil mi 352 ten nunna an chan tawh a, naupang 16 lai an thi tih an puang.
