Yangon ramțhen Hmawbi peng ih security gate pakhat cu November 11 zinglam suimilam 10:30 ah an kap tiah theih a si.
Hmawbi peng Tanuipin khua nambat 5010-nak tank ralkap (tuihlan nambat 2-nak tank ralkap) security gate cu zo timi theih lo hriamkai in November 11 zinglam suimilam 10:30 ah an kap ih ralkap pakhat a thi, mi pakhat hriamhma a ngah tiah ralkap naivai pawl hnenin theih a si.
Hi kahawknak ruangah Hmawbi luhsuahnak toll gate le tank ralkap hmunpi hmai pawl cu ziangvek motor khal feh an kham ih mi sukso an cek rero thu theih a si.
“Hmawbi toll gate kiangah lamzin an phit ih mi an cek rero, a feh hrimhrim an siang lo, motor khal bike khal an cek thluh, Hmawbi ra fehtu ding motor pawl an rat hrih lo asile a țha ding” tiah tualsungmi pakhat in a sim.
