Qatar World Cup 2022 ah an ram Portugal chu World Cup nomawi chawipui lo mahse Cristiano Ronaldo chu a kawppui Georgina Rodriguez in kum in Christmas pual in thilpek hlu leh ropui zet mai a pe.
Georgina Rodriguez chuan a kawppui former Man United forward hnen ah Rolls Royce a lei sak a, hei hi Rolls Royce Phantom model niin a man zat hi £250,000 vel nia chhut a ni.
Ronaldo hnen a a thil pek hi Georgina chuan Instagram ah a post a, car thar lawm nan chhungkua in an chuang bawk. Georgina hian Ronaldo hnen ah hian a hma pawn thilpek man to alo pe tawh thin a, tuna Rolls Royce a dawn pawh hi a luxury collection ah telin a hung ve leh ran dawn a ni.
Kum in hi Ronaldo tan kum tha a ni hran lem lo. A club khelhna Manchester United nen an inkar boruak tha lo in Club a chhuahsan hial a, Piers Morgan interview ah an manager Erik ten Hag a zahloh thu a sawina te chuan infiamna khawvel ah thawm a rawn nei ring hle bawk.
Manchester United a chhuahsan hnu ah Ronaldo hian a khelh lehna tur engmah ala tichiang lo. Marca news in a tarlan dan chuan Saudi Arabian club, Al-Nassr ah kum 2025 thleng daih tur contract a sign dawn niin an puang a, contract hi an ziakfel thei a nih chuan kum khat ah Ronaldo hian £173m a hlawh dawn niin an tarlang.
