G7 – ASEAN Summit cu Livarpur khawpi ah December 10 – 12 tiang an tuah ding thu inntek țuanvo latu British ram cun November 22 ah simnak an nei.
Hi Summit thawn pehparin November 22 ah British ramleng tlangbawi zung ih thuthannak ah Myanmar thawn pehparin tarlangmi a um lo na’n, ramleng le țhansonak lam tlangbawi Almanda Milin cun Myanmar ralkap hotu cu Summit kan sawm lo ding tiah November 21 ah a rak sim.
“Myanmar ralkap acozah cu anmah rori meeting kai dingah sawm lo a si thu British acozah cun felfai zetin sim a țul” tiah tlangbawi Almanda Milin cun a sim.
Cuihleiah October thla ih tuahmi ASEAN Summit ah tel dingin Myanmar ralkap hotu Min Aung Hlaing cu an rak sawm lomi ASEAN thutluknak khal kan upat a țul tiah a sim bet.
“Myanmar ralkap ih rampi thuneihnak an laknak, mipi an nekrawtnak, mipi acozah țuanvo neitu pawl, zatlang pawlkom pawlih hruaitu pawl an kaih rero mi cu British acozah in kan dem a si, British dinhmun in Myanmar ram buainak cem theinak hrangah ASEAN thawn hna kan țuantlang vivo ding” tiah tlangbawi Almanda Milin in a sim thu theih a si.
G7 – ASEAN Summit ah Covid – 19 boruak karlak sumdawnnak lam tundinsalnak, leitlun harhdamnak le milai covo telin thuhla phunphun relkhawmnak an neih ding thu British ramleng tlangbawi zung cun thuthannak an nei.
G7 – ASEAN Summit ah Malaysia, Thailand le Indonisia tlangbawi pawl khal tel ding an siih, G7 ramleng tlangbawi pawl thurelnak ah ASEAN hi hmaisabik an telnak ding a si.
