Italian supercar manufacturer Ferrari chuan Pop Star, Justin Bieber chu an ensan tur zingah an telh tih sawi a awm a, tun a chinah Justin Bieber hian Ferrari car a lei ve thei tawh dawn lo.
Tarlan danin carmaker company ten Justin Bieber ensan an tum chhan hi an lirthei lei tu ten an kutchhuak an enkawl dan chungchang ah dan an zam leh siam te a bawhchhia an ti a, Justin hian car modification rules a zawm lo niin an puh.
Justin hian 2011 F458 Italia a neih chu a rawng duh khawp lovin a var atang in electric blue ah alo thlak danglam a, hei mai bakah Milan-based newspaper, Il Giornale in a report danin a steering wheel a Ferrari’s horse logo chuanna chu thai bo in alloy wheels leh body kit te ama duh dan in alo thlak danglam bawk ani.
Hriat leh zel danin Beverly Hills nightclub pawn a parking lot ah F458 hi alo hnuchhiah tawp tawh bawk a, charity auction atan a dah tih te sawi ani. Heng te vang hian car siamtu Ferrari lung a ti awilo hle a, Ferrari te hi car siamchhuahna lamah lar leh hmingthang tak an ni a, an lirthei lei tu te ah pawh an fimkhur hle. An lei atang a kum 1 na ah hralhchhawn an phal lo a, hralh an tum a nih pawh in an mahni lam an hriat tir leh hmasa phawt thin tur ani.
A khawsak dan leh a lirthei enkawl dan avang hian Ferrari hian Bieber hi ensan turin chhuan lam an nei tha tawk thawkhat hle a, a damchhung zawng Ferrari car a lei leh tawh lo mai thei. Bieber car collection ah hian Ferrari bakah Lamborghini Aventador, Bugatti Veyron Grand Sport, Porsche 911 te a tel bawk.
Ferarri in milar a ensan zingah hian Justin Bieber chauh hi sawikai ani bik lo a, a hma in Kim Kardashian, Nicola Cage leb rapper Tyga te pawh an tel tawh.
