Chin ramkulh Falam khawpi hrambun ralkap khalahyah 268 ih ralkap sung thilri kaitu second lieutenant Ye Yint Thu cun October 19 sundir suimilam 12:00 hrawngah Falam distric palik zung ih ummi myanma economic bank ah ralkap fund ting 200 lenglo a suah ih nupi ru tahratin a tlan hlo tiah theih a si.
“Falam khawpi ih um mi pakhat cun “bank hi palik zung ah an țhawnnak a rei zo, ralkap pawlih fund hi ting 800 hrawng a um, cumi sung ihsin ting 200 lenglo a suah ih a tlan,a bike hi Falam khawsuah Cinmual veng ah an hmu, ka zum dan ahcun an nu’i bike lole motor thawn an tlan si ko ding, hriamhrei cu a keng lo” tiah Zalen Media hnenah simnak a nei.
Battallion ihsin tangka ting 200 lenglo tlanpitu second lieutenant Ye Yint Thu cu Falam hrambun CNO/CNDF hnenah pehtlaihnak zianghman a nei hrih lo tiah theih a si.
Kan dung September thla sung khalah Falam khawsung ih țuanvo latu Katha hrambun ih Major level pakhat cu a kuthnuai in a rak kap that tiah theih a si.
CNO/CNDF cun ralkap council hriamkai pawl an hnenah hriamhrei famkim thawn an kop asile tangka ting 50 laksawng an pek ding thu theih a si.
