Khawvel a hausa ber a puan SpaceX neitu leh Tesla CEO ni bawk Elon Musk chu Google co-founder Sergey Brin nupui Nicole Shanahan nen a rukin an lo inkawp ve zuai tih sawi a awm.
Wall Street Journal report in a tarlan dan in Musk leh Sergey Brin nupui Nicole Shanahan te hi nikum December thla chawhma lam ah khan Miami ah hun reilo te chhung an inchhai a, hemi hnu mai ah kumin January thla khan Brin hian Shanahan nen an inthenna tur hi thehlut in an inkar chu siam that leh theih rual loh angin a sawi bawk a ni.
Report in a sawi zel danin Brin leh Musk te hi thian tha tak an ni thin a, 2008 a Tesla company in hun harsa tak a tawh lai pawh in Brin hian sum thahnem tak in alo tanpui tawh nghe nghe.
Amaherawh chu Musk leh Shanahan te inkara thleng hi hriatchhuah a nih tak vangin Brin leh Musk te inkara inthianthatna pawh chu sawinghin in a awm phah nia tarlan a ni.
He thuthang awm mek chungchang ah hian Tesla CEO chu rawn tawngchhuak in Twitter kaltlangin a chanchin mawilo tak sawi rik awm chu belhchian dawllo leh dawt thu phuahchawp a ni tih a sawi thung.
Elon Musk chuan Sergey Brin nen hian thian inkawmngeih tak an ni a, nizan mai pawh khan party ah kan kal dun. Shanahan hi kum 3 chhung in vawi hnih chiah kan la inhmu a, chumi tumah pawh chuan a fal nilovin kan bul velah midang an awm ve bawk. Eng inngaihzawnna leh inlem velna mah a awm lo hrim hrim a ti.
Tun hi Elon Musk hian puhna a dawn hmasak berna a ni tawh lo a, a hma pawh in hminghliau theih na tur puhna alo tawk ve fo. Bloomberg Billionaires Index. in a tarlan danin Musk hausakna hi $242 billion niin tuna khawvel mihring damlai zinga hausa ber a ni a, Brin hian $94.6 billion nei ve in khawvel mi hausa list tarchhuah ah pariatna dinhmun a hauh ve mek bawk.
