Defense Service Academy (DSA) tlawng țhehtu pawl hi mipi sumpai rampi budget thawn tlawngkai an siih, mipi harsatnak tambik petu an si hleiah rampi hrang khalih hnațuan lotu an si tiah CDM ralbawi pakhat in simnak a nei.
February 1 ih ralkap in rampi thuneihnak a lak hnu mipi pawl thi dingin tumtahnak thawn meithal ih mi kap that rerotu hmuntin ih țuanvo nei DSA tlawng țheh ralbawi pawl le palik bawi pawl cu ralkap council ih fialmi vekin an tuahmi a si tiah a sim.
Mipi pekmi siah pawl thawn DSA ah raldo dan zir tahratin rampi hrang hna an țuan sal caan ah mipi that rerotu DSA tlawng țheh ralbawi pawlih hnațuan dan hi DSA ih hminthatnak a siat hleiah DSA ih thuanthu siatsuahtu an si tiah CDM ralbawi DSA țum 52-nak ih tlawng țheh captian ညီသုတ in simnak a nei.
Rampi budget thawn raldo dan zirtu DSA tlawng țheh pawl hi rampi le mipi hrangah ziangtluk in țuanvo an neh timi thusuhnak a um tinten DSA tlawng țheh ralbawi pakhat dinhmun in ka ning a zak tuk tiah captian ညီသုတ in a sim bet.
Tuihlan ahcun DSA tlawngkai dingah mipum bikhiahmi hnakih tam in an dil ih DSA tlawngkai duh ko na’n kai theilo an um lai ah atu cu DSA tlawngkai dingin diltu an mal tuk ruangah dil caan khal a țhan tiah theih a si.
Ralkap in rampi thuneihnak a lak hlan ahcun DSA tlawng țheh ralbawi pakhat dinhmun in neta san ah ralkap țha sersuaktu DSA tiah ka suang zet nan atu ahcun mipi pawl that rerotu DSA tlawng țheh ralbawi pawl ruangah DSA tlawng ka kai cu ka sir aw tuk tiah CDM ralbawi Lieutenant ဇာနည်အောင် khalin simnak a nei.
DSA tlawng țheh ralbawi pawl dinhmun in ralkap pakhat sinak thawn thupek an zom timi cu kan cohlang ko na’n rampi le mipi hrangah hlawknak a um lomi, rampi thuneihnak longtu mi burkhat hlawknak men ih thupekmi a si ahcun zom a țul lo tiah CDM ralbawi pawlin an sim.
Rampi thuneihnak longtu ralkap council hnuaiah hnațuan duh loin CDM tuahtu ralbawi 1000 an um ih NUG ih Ministry Of Defense cun theihpinak CDM code nambat a suahsak tiah theih a si.
