Karenni ramkulh Demoso peng Sanpiah 6 mile khua uksuh Huphik (ဟိုဖိတ်) khua kiangih hmunram nortu ralkap 100 hrawng le Karenni ralkap (KA/KNDF/ Local PDF) pawl thawn November 25 zinglam suimilam 5:00 hrawng ihsin zinglam suimilam 9:30 tiang an kap aw ih Karenni ralkap lam ihsin KNDF sungtel mi 4 an thih thu theih a si.
“Doawknak thok caan hi zinglam suimilam 5:00 hrawng a si, ramkulh hrambun ralkap battallion 427 thawn a si, doawknak hmun hi Huphik (ဟိုဖိတ်) khua lam ah a si, Karenni ralkap pawl thawn kan tong aw ih kan kap aw, doawknak hi zinglam suimilam 9:00 hrawngah a dai sal, doawknak ah KNDF sungtel mi 4 an thi, midang cu hriamhma tuar an um lo, ralkap lam mithi le hriamhma tuartu dinhmun kan theifiang hrih lo” tiah KNDF țuanvo neitu pakhat in simnak a nei.
Doawknak ah ralkap lam cun hriamhreipi an hmang ih doawknak a daih hnu khalah vei 2 an kap bet. Cuihleiah Loikaw hrambun pukpi ralkap hmumpi khalin hriamhreipi thawn doawknak an rak bawm, Huphik (ဟိုဖိတ်) khua mipi cu khua ihsin an tlansuak thluh, mi hrekkhat pawl thilri khal kan thiarpi rero tiah a sim bet.
November 24 zinglam khalah Demoso peng Sanpiah 6 mile khua le Dawphusii khua ah doawknak a um ih ralkap lam mi 2 an thi ih mi 5 hriamhma an ngah. November 23 khalah Demoso peng sungah doawknak țum 4 a um ih ralkap 5 an thi tiah KNDF cun thuthannak an rak nei.
Karenni ramkulh sungih doawknak ah Karenni ralkap mipum 32 thihnak an ton zo thu November 16 ah PKPF cun thuthannak an rak nei.
Tufang hi Demoso peng sungah doawknak a sosang sinsin thei ruangah mipi dinhmun in hmunram thuhla theihfiang hnuah ralringten sukso dingin KNDF cun forhfialnak an nei.
